పక్కకు వెళ్లి... మాట్లాడుకుని..!

చంద్రబాబు, డీకే మధ్య గుసగుసలు

గురువారం ఓ ఆసక్తికర రాజకీయ పరిణామం చోటు చేసుకుంది. తెలుగుదేశం అధినేత చంద్రబాబు నాయుడు, కర్నాటక కాంగ్రెస్‌ సీనియర్‌ నాయకుడు, ఉప ముఖ్యమంత్రి డీకే శివకుమార్‌ మధ్య... బెంగళూరు ఎయిర్‌పోర్ట్‌లో బహిరంగంగానే... ఓ చిన్న ‘రహస్య’ సమావేశం జరిగింది. ఇది ప్రస్తుతం రాజకీయ వర్గాల్లో హాట్‌ టాపిక్‌గా మారింది. బీజేపీతో పొత్తు కోసం ప్రయత్నిస్తున్న చంద్రబాబు... దక్షిణాదిలో కాంగ్రెస్‌ పార్టీకి చెందిన కీలకనేత డీకేతో మాట్లాడటం కొత్త సమీకరణాలకు దారి తీయొచ్చేమోనన్న ఊహాగానాలు మొదలయ్యాయి.

కుప్పం వెళ్లేందుకు చంద్రబాబు హైదరాబాద్‌ నుంచి బెంగళూరు చేరుకున్నారు. అక్కడ ఎయిర్‌పోర్టులో శివకుమార్‌ ఎదురయ్యారు. నాగపూర్‌లో జరిగిన కాంగ్రెస్‌ మీటింగ్‌కు  హాజరై ఆయన బెంగళూరు వచ్చారు. ఈ సందర్భంగా ఇద్దరూ పరస్పరం ఎదురై, కరచాలనం చేసుకున్నారు. అనంతరం శివకుమార్‌, చంద్రబాబును పక్కకు తీసుకెళ్లి కాసేపు ముచ్చటించడం కనిపించింది. త్వరలో ఆంధ్రప్రదేశ్‌లో అసెంబ్లీ ఎన్నికలు జరగనున్న తరుణంలో ఈ భేటీ ప్రాధాన్యత సంతరించుకుంది.