వివేక్ హ్యాండ్ మంచిదనేనా?

మాజీ పార్లమెంటు సభ్యుడు గడ్డం వివేక్ కాంగ్రెస్ లో దీర్ఘకాలం ఉన్నారు. అనంతరం టీఆర్ఎస్ లో చేరారు. టీఆర్ఎస్ లో ఆయనకు పొసగక బీజేపీలో చేరిపోయారు. బీజేపీలో చేరినప్పటి నుంచి ఆయనకు అధినాయకత్వం ప్రయారిటీ మామూలుగా ఇవ్వడం లేదు. ప్రతి ఉప ఎన్నికకు ఆయన గెలిపించే బాధ్యతను అప్పగించారు. దుబ్బాక నుంచి హుజూరాబాద్ ఉప ఎన్నిక వరకూ ఆయనకే బాధ్యత ఇచ్చారు. వివేక్ కూడా ఉప ఎన్నిక పూర్తయి ఫలితం వెలువడేంత వరకూ అభ్యర్థి ఎవరైనా ఆయన వెంటే ఉండి కథ అంతా నడిపించారు. దుబ్బాక, హుజూరాబాద్ లో అభ్యర్థులు స్ట్రాంగ్ అవ్వడంతో పాటు వివేక్ చేయి వేయడం వల్లనే గెలిచిందన్న అభిప్రాయం అధినాయకత్వంలో కలిగింది.

గతంలో దుబ్బాక ఉప ఎన్నికలోనూ వివేక్ కీలకంగా వ్యవహరించారు. రఘునందన్ పై సానుభూతి బీజేపీ విజయానికి పనిచేసినా ఎన్నికల వ్యూహాల అమలులో వెనక వివేక్ ఉన్నారని గ్రహించారు. అందుకే సిట్టింగ్ ఎమ్మెల్యే మరణించిన స్థానంలోనూ అదే కుటుంబానికి టిక్కెట్ ఇచ్చినా గెలిచారన్న అభిప్రాయం హైకమాండ్ కు కలిగింది. ఇక హుజూరాబాద్ ఉప ఎన్నికలో ఈటల రాజేందర్ స్ట్రాంగ్ కాండిడేట్. ఆయనను మంత్రి వర్గం నుంచి తొలగించారన్న సానుభూతి ఉంటుంది. కానీ వివేక్ ను ఆయన వెనకే నీడలా ఉంచి అధినాయకత్వం కథ నడిపించింది. అక్కడ కూడా బీజేపీకి అధికార పార్టీపై విజయం లభించింది.

దీంతో మునుగోడు ఉప ఎన్నిక బాధ్యతను వివేక్ ను అధినాయకత్వం నియమించింది. ఆయన ఆధ్వర్యంలో స్టీరింగ్ కమిటీని కూడా ఏర్పాటు చేశారు. ఇక్కడ అభ్యర్థి కోమటిరెడ్డి రాజగోపాల్ రెడ్డి ఆర్థికంగా బలమైన నేత. ఆ విషయంలో వివేక్ చేయాల్సిందేమీ లేదు. కానీ కేవలం వ్యూహరచనతో పాటు సామాజికవర్గం ఓట్లను కూడా ఆకట్టుకునేందుకు ఆయనకు బాధ్యతలు అప్పగించిందని చెబుతున్నారు. వివేక్ కు ఉప ఎన్నికల్లో సక్సెస్ రేటు ఎక్కువగా ఉండటంతో ఆయన మీదనే అధినాయకత్వం కూడా భారం మోపుతుందన్నది పార్టీలో వినిపిస్తున్న అభిప్రాయం. మరి మునుగోడు ఉప ఎన్నికలో వివేక్ ఏ మేరకు సక్సెస్ అవుతుందనేది చూడాల్సి ఉంది.