రోడ్డు ప్రమాదంతో నలుగురు విద్యార్థుల మృతి

యాదాద్రి భువనగిరి జిల్లా బొమ్మలరామారం మండలం మైసిరెడ్డిపల్లిలో ఘోర రోడ్డు ప్రమాదం జరిగింది. ఇక్కడి ఓ ఫాం హౌజ్ లో పార్టీ చేసుకొని హైదరాబాద్ వెళుతున్న విద్యార్థుల కారు బోల్తా కొట్టడంతో నలుగురు ఇంజనీరింగ్ విద్యార్థులు మృతి చెందారు. చనిపోయిన విద్యార్థులంతా ఇబ్రహీంపట్నంలోని ఓ ఇంజనీరింగ్ కళాశాలలో ఇంజనీరింగ్ చివరి సంవత్సరం చదువుతున్నారు. మరికొన్ని రోజుల్లో కళాశాల పూర్తి అవుతుండటంతో అంతా కలిసి బొమ్మలరామారం వద్ద ఓ ఫాం హౌజ్ లో పార్టీ చేసుకున్నారు. తిరిగి హైదరాబాద్ వెళుతుండగా ఈ ప్రమాదం జరిగింది. చైతన్య, స్ఫూర్తి, ప్రణీత అనే విద్యార్థులు అక్కడికక్కడే మృతి చెందగా వినీత్ రెడ్డి అనే విద్యార్థిని ఆసుపత్రికి తరలిస్తుండగా మార్గమధ్యలో కన్నుమూశాడు. మరో విద్యార్థి మనీష్ రెడ్డి పరిస్థితి విషమంగా ఉంది. విద్యార్థుల మృతితో వారి తల్లిదండ్రులు కన్నీరుమున్నీరు అవుతున్నారు. భువనగిరి ఏరియా ఆసుపత్రికి వారి మృతదేహాలను తరలించారు. కాంగ్రెస్ నేతలు కోమటిరెడ్డి బ్రదర్స్ ఆసుపత్రికి చేరుకొని మృతుల తల్లిదండ్రులను ఓదారుస్తున్నారు. కాగా, ఈ ప్రమాదం జరిగిన మైసిరెడ్డిపల్లి పక్కనే ఉన్న హజీపుర్ గ్రామంలో నిన్నమొన్న ముగ్గురు బాలికల హత్యల విషయం వెలుగులోకి వచ్చిన సంగతి తెలిసిందే.