Chandrababu : 1995 నాటి చంద్రబాబు అవుతారా? నో నెవ్వర్ అంటున్న క్యాడర్

ఇప్పటికి నాలుగు సార్లు ముఖ్యమంత్రిగా చంద్రబాబు పనిచేశారు. పార్టీ అధికారంలోకి రాలేనిసమయంలో ప్రతిపక్ష నాయకుడిగా వ్యవహరించారు. ప్రతిపక్ష నాయకుడిగా కూడా ఉమ్మడి ఆంధ్రప్రదేశ్ లో సమర్థవంతమైన పాత్రను ఆయన పోషించారు. ఇప్పుడు 2025లో ఉన్నాం. అంటూ ముప్ఫయి ఏళ్లకు వెనక్కు వెళితే.. ఆయనేంటో అందరికీ తెలుసు. పార్టీని, ప్రభుత్వాన్ని ఒంటిచేత్తో నడిపేవారు. నిత్యం సమీక్షలు నిర్వహించేవారు. నాడు హైదరాబాద్ సచివాలయంలో రాత్రి 9 గంటల వరకూ జిల్లా కలెక్టర్లతో వీడియో కాన్ఫరెన్స్ నిర్వహించేవారు. అక్కడి నుంచి జూబ్లీహిల్స్ లోని తన నివాసానికి వెళుతూ దారి మధ్యలో ఉన్న తెలుగుదేశం పార్టీ కేంద్ర కార్యాలయానికి వెళ్లి అక్కడ పార్టీ నేతలతో భేటీ అయి గంట సేపు వారికి దిశానిర్దేశం చేసేవారు.

కానీ ఇప్పుడు పార్టీకి కేటాయించే సమయం తక్కువగానే ఉంటుంది. అదే సమయంలో సమీక్షలను మాత్రం శాఖల వారీగా నిర్వహిస్తున్నారు. దీంతో పాటు ఆకస్మిక తనిఖీలను కూడా విస్తృతంగా చేసేవారు. చంద్రబాబు ఆకస్మిక పర్యటనలకు వచ్చారంటే ఎవరో ఒకరు సస్పెండ్ అయ్యే వారు. అందుకే అధికారులు ఒళ్లు దగ్గరపెట్టుకుని పనిచేసేవారు. ఇప్పుడు ఏడు నెలలు గడుస్తున్నా చంద్రబాబు ఆకస్మిక పర్యటనలు చేయడం లేదు. ఇక మరొక కీలకమైన అంశం. మంత్రులు. మంత్రుల విషయంలో కూడా చాలా స్ట్రిక్ట్ గా ఉండేవారు. ఏమాత్రం తోక జాడించారని తెలిసినా వెంటనే యాక్షన్ లోకి దిగేవారు. నాడు న్యూస్ ఛానల్స్ లేవు. కేవలం పత్రికలు మాత్రమే. పత్రికల్లో వచ్చిన వార్తల ఆధారంగా చర్యలు తీసుకునే వారు.

నాటి ఉమ్మడి ఆంధ్రప్రదేశ్ లో కర్నూలు నుంచి నాడు ఒక అవినీతి కథనం ఒక ప్రధాన పత్రికలో ప్రచురితమైంది. అయితే అందుకు బాధ్యులైన నాటి మంత్రి పోచారం శ్రీనివాసులురెడ్డిని వెంటనే కేబినెట్ నుంచి తొలగించి సంచలనమే సృష్టించారు. కానీ నేడు మంత్రుల జోలికి వెళ్లాలన్నాచంద్రబాబు నాటి దూకుడు ప్రదర్శించలేకపోతున్నారని ఆయనను దగ్గర నుంచి తెలిసిన వ్యక్తులు అనుకోవడం సహజం. ఎందుకంటే ఇన్ని ఘటనలు జరిగినా దానికి బాధ్యులను చేస్తూ మంత్రులపై యాక్షన్ తీసుకోకపోవడంతో చంద్రబాబు 1995 నాటి ముఖ్యమంత్రి గా మారతారన్న నమ్మకం లేదని పార్టీ నేతలే భావిస్తున్నారు. అలాగే క్యాడర్ కూడా ఇదే అభిప్రాయంలో ఉంది. చంద్రబాబు పదే పదే తనలో 1995 ముఖ్యమంత్రి ని చూస్తారన్న మాటలు వాస్తవరూపం దాల్చేదెన్నడూ అని క్యాడర్ కూడా ఎదురు చూపులు చూస్తూ ఉంది. అయితే అప్పుడు ఆయన నలభై పదుల వయసులో ఉండటానికి ఆ దూకుడుకు కారణమన్న కామెంట్స్ కూడా లేకపోలేదు.