ఒమిక్రాన్ అలజడి - ఏపీలో డోర్ టు డోర్ ఫీవర్ సర్వే

ఒమిక్రాన్ భయంతో ఇప్పటికే గన్నవరం, రేణిగుంట, వైజాగ్ ఇలా రాష్ట్రంలో ఉన్న విమానాశ్రయాలన్నింటిలోనూ ప్రతి ప్రయాణికుడికి కోవిడ్ నిర్థారణ పరీక్షలు నిర్వహిస్తోంది ఏపీ ఆరోగ్య శాఖ. నేటి నుంచి వారంలో ఐదురోజులు అంటే సోమవారం నుంచి శుక్రవారం వరకూ ఆశావర్కర్లు, వాలంటీర్లు డోర్ టు డోర్ ఫీవర్ సర్వే నిర్వహించనున్నారు. ప్రతి ఇంటికి వెళ్లి.. ఆ ఇంట్లోని కుటుంబ సభ్యుల ఆరోగ్యం ఎలా ఉందో తెలుసుకోనున్నారు. ఎవరికైనా జ్వరంతో పాటు ఇతర కోవిడ్ లక్షణాలుంటే.. వారి వివరాలను మెడికల్ ఆఫీసర్ కు పంపిస్తారు. ఆ తర్వాత కోవిడ్ నిర్థారణ పరీక్షలు చేసి, బాధిత వ్యక్తి ఐసోలేషన్ లో ఉండాలో.. లేదో సూచిస్తారు.

కోవిడ్ నిర్థారణ పరీక్షల్లో పాజిటివ్ గా తేలితే..జీనోమ్ సీక్వెన్సింగ్ పరీక్షలకు పంపిస్తారు. ఉచితంగా మందుల కిట్ ఇవ్వడంతో పాటు వైద్యుల పర్యవేక్షణలో కావాల్సిన సహాయం కూడా చేస్తారు. ఈ సర్వేలో సేకరించిన డేటా మొత్తాన్ని సిబ్బంది ఆన్ లైన్ లో నిక్షిప్తం చేయనున్నారు.