తిరుమలకు ద్విచక్ర వాహనాల రాకపోకలపై నిషేధం

అయితే ఎల్లుండి గరుడ సేవ. గరుడ సేవకు భక్తులు తిరుమలకు పోటెత్తుతారు. ఎంత మంది వస్తారో కూడా అంచనా వేయలేకపోతున్నారు. ఈ పరిస్థితుల్లో ఎల్లుండి జరిగే గరుడ సేవ సందర్భంగా టీటీడీ పలు కీలక నిర్ణయాలు తీసుకుంది. మే 19వ తేదీ ఉదయం ఆరు గంటల నుంచి 20వ తేదీ ఉదయం ఆరు గంటల వరకూ ద్విచక్రవాహనాలను కొండమీదకు అనుమతించరు. తిరుమలలో కేవలం 32 పార్కింగ్ ప్రదేశాల్లో పదిహేను వేల వాహనాలు మాత్రమే పడతాయి. మాడ వీధుల్లోనూ లక్ష ఇరవై వేల మంది సామర్థ్యమే ఉంది. గరుడ వాహన సేవకు అంతకు మించి హాజరవుతారని భావించి టీటీడీ ఈ నిర్ణయం తీసుకుంది. చిన్న పిల్లలకు జియో ట్యాగింగ్ వ్యవస్థను ఏర్పాటు చేస్తున్నారు. వాహనాలకు అలిపిరి వద్దనే ప్రత్యేకంగా పార్కింగ్ ఏర్పాటు చేసినట్లు అధికారులు వెల్లడించారు.