Visakha MLC : విశాఖ ఎమ్మెల్సీ ఎన్నికల్లో టీడీపీ పోటీ చేస్తుందా? లేక తప్పుకుంటుందా?

వైసీపీకి ఈ ఎన్నికల్లో 600 ఓట్లు వరకూ ఉండగా, టీడీపీకి 250 ఓట్లు మాత్రమే ఉన్నాయి. గెలవాలంటే మరో వంద నుంచి నూట యాభై ఓట్లను తమ వైపునకు తిప్పుకోవాల్సి ఉంటుంది. అయితే ఇప్పటికే వైసీపీ తమ ఓటర్లను క్యాంప్ లకు తరలించింది. బెంగళూరుకు ఎంపీటీసీ, సర్పంచ్ లను చేరవేసింది. కొన్ని నియోజకవర్గాల్లో సర్పంచ్ లు, ఎంపీటీసీలు తెలుగుదేశం పార్టీ వైపు వచ్చేందుకు మొగ్గు చూపుతున్నా వచ్చే వారి సంఖ్య గెలుపునకు దోహదం చేయదని భావిస్తున్నారు.

ఈ నేపథ్యంలోనే నిన్న జరిగిన సమావేశంలో చంద్రబాబు వద్ద కొందరు నేతలు ఇదే విషయాన్ని ప్రస్తావించినట్లు తెలిసింది. పోటీ చేసి ఓటమి పాలయ్యేకంటే ఒక ఎమ్మెల్సీ కోసం పోటీ చేసి పరువు పోగొట్టుకోవడం ఎందుకని సీనియర్ నేతలు కూడా ప్రశ్నిస్తున్నారు. ఆ ఎమ్మెల్సీ వల్ల ఒరిగేదేమీ లేదని మరికొందరు అభిప్రాయపడుతున్నారు. అందుకే చంద్రబాబు నాయుడు దీనిపై నిన్న ఎలాంటి నిర్ణయం తీసుకోకుండా దాట వేశారు. బలాబలాలను చూసిన తర్వాత ఆయన టీడీపీ అభ్యర్థిని బరిలోకి దింపుతారా? లేదా? అన్నది కూడా అనుమానంగా మారింది. ఏ విషయమూ చంద్రబాబు ఈరోజు క్లారిటీ ఇచ్చే అవకాశముంది.