తెలంగాణలోకి నైరుతి రుతుపవనాలు వచ్చేది ఎప్పుడంటే?

తెలంగాణలోకి నైరుతి రుతుపవనాలు ఇంకా ప్రవేశించలేదు. ఏపీలోనే నైరుతి రుతుపవనాలు విస్తరించి ఉన్నాయి. గత నాలుగు రోజులుగా ముందుకు కదలడం లేదు. అరేబియా మహా సముద్రంలో ఏర్పడిన బిపోర్ జాయ్ తీవ్ర పెను తుఫాన్ కారణంగా నైరుతి రుతుపవనాలు బలహీనపడిపోయి ఏపీలోనే ఆగిపోయాయి. దీంతో తెలంగాణను ఆలస్యంగా తాకనున్నాయి. జూన్ 19 నాటికి తెలంగాణను నైరుతి రుతుపవనాలు తాకే అవకాశముందని హైదరాబాద్ వాతావరణ కేంద్రం అధికారిణి శ్రావణి తెలిపారు. 19వ తేదీన రాష్ట్రంలోకి ప్రవేశిస్తే అవకాశముందని అంచనా వేశారు. ఆ రోజున చేరుకుంటే.. రాష్ట్రవ్యాప్తంగా విస్తరించడానికి వారం రోజుల సమయం పడుతుందని చెప్పారు. నైరుతి రుతుపవనాలు తాకగానే వెంటనే వర్షాలు పడవని, తొలకరి మొదలవ్వడానికి కొద్దిరోజుల సమయం పడుతుందని వాతావరణశాఖ చెబుతోంది. జూన్ 10వ తేదీ నాటికి రాష్ట్రంలోకి ప్రతి ఏడాది రుతుపవనాలు చేరుకుంటాయి. రుతుపవనాల ఆలస్యం వల్ల తెలంగాణలో ఎండలు, వడగాలుల తీవ్రత మరింత పెరగనున్నాయి.