Tirumala : తిరుమలలో నేడు రద్దీ ఎలా ఉందంటే.. మీరు నమ్మరు ఇది నిజం

తెలుగు రాష్ట్రాలకు భారీ వర్ష సూచన రావడంతో ఇక్కడి నుంచి భక్తుల సంఖ్య తక్కువగానే ఉందని, ఇతర ప్రాంతాల నుంచి భక్తులు అధిక సంఖ్యలో వచ్చారని తిరుమల తిరుపతి దేవస్థానం అధికారులు తెలిపారు. తుపాను హెచ్చరికల నేపథ్యంలో తిరుమలలో కూడా అన్ని జాగ్రత్తలు తీసుకున్నామని అధికారులు తెలిపారు. ఈరోజు తిరుమలలోని వైకుంఠం క్యూ కాంప్లెక్స్ లోని ఇరవై కంపార్ట్‌మెంట్లలో భక్తులు శ్రీవారి దర్శనం కోసం వేచి ఉన్నారు. ఉచిత దర్శనం క్యూ లైన్ లో ఉదయం ఏడు గంటలకు టోకెన్లు లేకుండా ప్రవేశించిన భక్తులకు శ్రీవారి దర్శనం పన్నెండు గంటల సమయం పడుతుందని అధికారులు తెలిపారు. టైమ్ స్లాట్ దర్శనం భక్తులకు నాలుగు గంటల సమయం పడుతుంది. మూడు వందల రూపాయల ప్రత్యేక దర్శనం టిక్కెట్లను కొనుగోలు చేసిన భక్తులకు రెండు నుంచి మూడు గంటల సమయం పట్టే అవకాశముంది. నిన్న తిరుమల శ్రీవారిని 86,900 మంది భక్తులు దర్శించుకున్నారు. 28,739 మంది భక్తులు తమ తలనీలాలను సమర్పించుకుని మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 2.56 కోట్ల రూపాయల ఆదాయం వచ్చిందని అధికారులు తెలిపారు.