Tirumala : తిరుమలలో రద్దీ కొంత తగ్గినట్లే ఉన్నప్పటికీ.. దర్శన సమయం మాత్రం?

గత కొన్ని రోజులుగా తిరుమలలో భక్తుల రద్దీ ఒక్కసారిగా పెరిగింది. పది, ఇంటర్ పరీక్షలు పూర్తి కావడంతో ఎక్కువ మంది విద్యార్థులు, వారి తల్లిదండ్రులు తిరుమలకు వచ్చి ఏడుకొండల వాడిని దర్శించుకుని మొక్కులు చెల్లించుకుంటున్నారు. అయితే తిరిగి ఇంటర్ తరగతులు ప్రారంభం కావడంతో కొంత రద్దీ తగ్గింది. అదే సమయంలో ఇక పరీక్ష ఫలితాలు వచ్చిన తర్వాత రద్దీ మరింత పెరుగుతుందని తిరుమల తిరుపతి దేవస్థానం అధికారులు అంచనా వేస్తున్నారు. వేసవిలో సాధారణంగా భక్తులు అధిక సంఖ్యలో తిరుమలకు వస్తుంటారు.

ఈరోజ తిరుమలలోని వైకుంఠం క్యూ కాంప్లెక్స్ లోని పథ్నాలుగు కంపార్ట్ మెంట్లలో భక్తులు శ్రీవారి దర్శనం కోసం వేచి ఉన్నారు. ఉచిత దర్శనం క్యూ లైన్ లో వేచి ఉన్న భక్తులకు శ్రీవారి దర్శనం ఎనిమిది గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు నాలుగు గంటల సమయం పడుతుంది. మూడు వందల రూపాయల ప్రత్యేక దర్శనం కొనుగోలు చేసిన భక్తులకు శ్రీవారి దర్శనం రెండు నుంచి మూడు గంటల సమయం పడుతుంది. నిన్న తిరుమల శ్రీవారిని 72,721 మంది భక్తులు దర్శించుకుని మొక్కులు చెల్లించుకున్నారు. వీరిలో 25,545 మంది భక్తులు తమ తలనీలాలను సమర్పించుకున్నారు. అలాగే నిన్న తిరుమల శ్రీవారి హుండీ ఆదాయం నాలుగు కోట్ల రూపాయలు వచ్చిందని అధికారులు వెల్లడించారు.