చంద్రబాబు నాయుడును ఎవరూ ఉరి తీయరు: సజ్జల

టీడీపీ అధినేత చంద్రబాబు నాయుడు అరెస్టు వెనుక ఎలాంటి రాజకీయ దురుద్దేశాలు లేవని ప్రభుత్వ సలహాదారు సజ్జల రామకృష్ణ రెడ్డి అన్నారు. చంద్రబాబు నాయుడు తన హయాంలో బోగస్ కంపెనీలను సృష్టించి ప్రభుత్వం సొమ్మును అడ్డగోలుగా దోచిపెట్టారని.. రెండు సంవత్సరాల క్రితమే సీఐడీ ఈ కేసు నమోదు చేసినట్లు తెలిపారు. పూర్తిగా విచారణ చేసిన తర్వాత ఈ అరెస్టు జరిగిందని అన్నారు. ఎఫ్‌ఐఆర్‌లో తన పేరు లేకుండా ఎలా అరెస్టు చేస్తారంటూ చంద్రబాబు అంటున్నారని అన్నారు. కానీ 2017,2018లోనే పూణెలో జీఎస్డీ విచారణలో షెల్ కంపెనీలకు సొమ్ము మళ్లించినట్లు అధికారులు అప్పుడే గుర్తించారని అన్నారు. వాస్తవానికి ఎఫ్‌ఐఆర్‌లో చంద్రబాబు నాయుడి పేరు పెట్టకపోవడం అంటే అక్కడే సీఎం జగన్ ప్రభుత్వం నిజాయతీ కనిపిస్తుందని అన్నారు. స్కిల్ డెవలప్‌మెంట్ కేసులో రెండు ప్రశ్నలకు ఇప్పటికీ సమాధానాలు లేవని అన్నారు. దాదాపు రెండు సంవత్సరాల తర్వాత విచారణ చేశాకే కేసు నమోదు చేసినట్లు తెలిపారు. అవినీతి జరగలేదని చంద్రబాబు నిరూపించుకోవాలని అన్నారు.