మోటారు సైకిళ్ళపై అనుమానాస్పదంగా తిరుగుతూ.. విచారించగా?

తిరుపతి జిల్లా సత్యవేడు సమీపంలోని అడవుల్లో కూంబింగ్ చేపట్టిన టాస్క్ ఫోర్సు పోలీసులు ఏడుగురు స్మగ్లర్లను అరెస్టు చేశారు. వీరి నుంచి 43ఎర్రచందనం దుంగలు, 3 మోటారు సైకిళ్లను స్వాధీనం చేసుకున్నారు. ఎర్ర చందనం స్మగ్లింగ్ నిరోధక టాస్క్ ఫోర్సు డి.ఎస్.పి. చెంచుబాబు కథనం ప్రకారం.. రైల్వే కోడూరు ఆర్ఐ కృపానంద, ఆర్ఎస్ఐ అలీభాషా సత్యవేడు సమీపంలోని నాగలాపురం అడవుల్లో కూంబింగ్ చేపట్టారు. ఆ సమయంలో కొందరు బీరకుప్పం ప్రాంతంలో మోటారు సైకిళ్లతో అనుమానాస్పదంగా కనిపించారు. వీరిని ప్రశ్నించడంతో పొంతన లేని సమాధానాలు చెప్పారు. దీంతో వీరిని అదుపులోకి తీసుకుని విచారించగా.. తాము ఎర్రచందనం స్మగ్లర్లమని స్పష్టం చేశారు. వీరి వద్ద 43ఎర్రచందనం దుంగలు ఉన్నట్లు అంగీకరించారు. ఆ తర్వాత ఎర్రచందనం దుంగలను స్వాధీనం చేసుకున్నారు. స్వాధీనం చేసుకున్న దుంగలు 664 కేజీలు ఉన్నాయని, వీటి విలువ సుమారు రూ.30లక్షలు ఉంటాయని డీఎస్పీ చెంచుబాబు తెలిపారు.