శనివారం విశాఖపట్నంలో జరిగిన విశాఖ గర్జన సభలో పాల్గొని తిరిగి వస్తున్న మంత్రులు జోగి రమేశ్, రోజా, టీటీడీ ఛైర్మన్ వైవీ సుబ్బారెడ్డిలపై వైజాగ్ ఎయిర్‌పోర్ట్‌లో జరిగిన దాడికి సంబంధించి పోలీస్ అధికారులపై ప్రభుత్వం చర్యలు తీసుకుంది. ఎయిర్‌పోర్ట్ సీఐ ఉమాకాంత్, కంచరపాలెం సీఐ కృష్ణారావులపై ఉన్నతాధికారులు వేటు వేశారు. వీరిద్దరిని వీఆర్‌కు పంపిస్తూ ఉత్తర్వులు జారీ చేశారు. ఏపీ మంత్రులపై దాడి ఘటనలో పలువురు జనసేన నాయకులు, కార్యకర్తలను పోలీసులు అదుపులోకి తీసుకున్నారు. అరెస్టైన 61 మందిని రూ. పదివేల పూచీకత్తుపై కోర్టు వారిని విడుదల చేసింది. మరో తొమ్మిదిమందికి ఈ నెల 28 వరకు రిమాండ్ విధించింది. తొమ్మిది మందిపై 307 సెక్షన్ తొలగించి 326 సెక్షన్ గా మార్చి రిమాండ్ విధించారు. వైజాగ్ ఎయిర్ పోర్టు ఘటనకు దారి తీసిన పరిస్దితులపై ఏపీ ప్రభుత్వం సమగ్రంగా అఫిడవిట్ దాఖలు చేయాలని హైకోర్టు ఆదేశించింది. అనంతరం మరోసారి ఈ వ్యవహారంపై విచారణ జరుపుతామని ప్రకటించింది. అయితే జనసేన కార్యకర్తల్ని వైసీపీయే రెచ్చగొట్టిన్నట్లు జనసేన ఆరోపిస్తోంది.