'పవన్‌.. ముందు గ్లాసు వెతుక్కో'.. పేర్ని నాని సెటైర్‌

ఏపీ రాజకీయాల్లో ఏ మాత్రం హీట్‌ తగ్గడం లేదు. ఒకరిపై ఒకరు కత్తుల్లా దూసుకుపోతూ విమర్శలు చేసుకుంటున్నారు. ఇక జనసేన అధినేత పవన్‌ కల్యాణ్‌ తన వారాహి యాత్ర మొదలు పెట్టిన రోజు నుండి.. వైసీపీ ప్రభుత్వమే టార్గెట్‌గా ముందుకెళ్తున్నారు. ఈ క్రమంలోనే పవన్‌ కల్యాణ్‌పై మాజీ మంత్రి, వైసీపీ పేర్ని నాని చేసిన కామెంట్స్‌ హాట్‌ టాపిక్‌ అవుతున్నాయి. ఒక చెప్పు చూపిస్తూ, మక్కెలిరగొడతానంటూ పవన్‌ కల్యాణ్‌ తమకు వార్నింగ్‌ ఇచ్చాడని, అయితే తమకు కూడా రెండు చెప్పులు ఉన్నాయని పవన్‌ని ఉద్దేశిస్తూ ఓ ప్రెస్‌మీట్‌లో పేర్ని నాని రెండు చెప్పులు చూపించడం దుమారం రేపింది.

పేర్ని నాని రెండు చెప్పులు చూపించడంపై పవన్‌ కల్యాణ్‌ కూడా అంతే స్థాయిలో సెటైరికల్‌గా సమాధానం ఇచ్చారు. అన్నవరం ఆలయం బయట విడిచిన తన చెప్పులు పోయాయని, వాటిని ఎవరో దొంగిలించారని.. పిఠాపురంలో జరిగిన వారాహి యాత్రలో సెటైరికల్ కౌంటర్ ఇచ్చారు. దీంతో పవన్‌ కల్యాణ్‌, పేర్ని నానిల కౌంటర్‌, ప్రతి కౌంటర్లు సోషల్‌ మీడియాలో వైరలవుతున్నాయి. 'చెప్పులపై మాటల యుద్ధం: పేర్ని నాని వర్సెస్‌ పవన్‌ కల్యాణ్‌' అన్న రీతిలో వీరి వ్యవహారం కొనసాగుతోంది. ఈ నేపథ్యంలోనే తాజాగా పవన్‌కు పేర్ని నాని మరోసారి కౌంటర్ వేశారు.

పవన్‌ తన చెప్పులు పోయాయని ఆందోళన చెందుతున్నారని, అయినా ఆయనకు చెప్పులు పోయిన మూడు రోజుల తర్వాత ఇది గుర్తొచ్చిందా? అంటూ ఎద్దేవా చేశారు. చెప్పులు పోతే సరే.. ఎందుకంటే ఆయన ఎవరో ఒక నిర్మాత కొనిస్తారని, కానీ ఆయన పార్టీకి ఇప్పుడు గాజు గ్లాస్ గుర్తు కూడా పోయిందని పేర్ని నాని గుర్తు చేశారు. ముందుగా ఆ గాజు గ్లాసు గుర్తు ఎక్కడుందో వెతుక్కోవాలంటూ పవన్‌ కల్యాణ్‌ ఉద్దేశించి వెటకారంగా పేర్ని నాని మాట్లాడారు. పార్టీ గుర్తు పోయి చాలా రోజులైందని, చెప్పులు పోతే కంగారు అవసరం లేదని నాని చేసిన కామెంట్స్‌కు సంబంధించిన వీడియోలు ఇప్పుడు నెట్టింట వైరల్‌గా మారాయి. దీంతో నాని చేసిన కామెంట్స్‌పై పవన్ కౌంటర్ ఏలా ఉండబోతుందన్నది ఇంట్రెస్టింగ్‌గా మారింది.