Gold Prices : షాక్ ల మీద షాక్ లు.. రోజూ పెరుగుతున్న బంగారం ధరలు

గత కొద్ది రోజులుగా బంగారం ధరలు పెరుగుతూ కొనుగోలుదారులకు షాక్‌ల మీద షాకులిస్తున్నాయి. అయితే కొనుగోళ్లు మాత్రం తగ్గడం లేదని వ్యాపారులు చెబుతున్నారు. తమ వ్యాపారం సజావుగానే జరుగుతుందని వ్యాపారులు చెబుతున్నారు. అంతర్జాతీయ మార్కెట్ లో ధరల పెరుగుదల కారణంగా బంగారం ధరలు మరింత ప్రియంగా మారిపోయాయి. బంగారం ధరలు ఎవరికీ అందనంత దూరంలో ఉండిపోవడంతో కొనుగోలు చేయాల్సిన వారు కూడా ఎక్కువ మొత్తంలో కాకుండా మమ అనిపించేస్తూ శుభకార్యాల తంతు ముగించేస్తున్నారు.

ఈరోజు దేశంలో బంగారం ధరలు మళ్లీ పెరిగాయి. పది గ్రాముల బంగారం ధరపై నాలుగు వందల రూపాయల వరకూ పెరిగింది. వెండి ధరలు కూడా పెరిగాయి. అయితే వెండి ధరలు మాత్రం స్వల్పంగా పెరిగాయని మార్కెట్ వర్గాలు చెబుతున్నాయి. హైదరాబాద్ బులియన్ మార్కెట్ లో బంగారం, వెండి ధరలు ఇలా ఉన్నాయి. 22 క్యారెట్ల పది గ్రాముల బంగారం ధర 59,900 రూపాయలకు చేరుకుంది. 24 క్యారెట్ల పది గ్రాముల బంగారం ధర 64,250 రూపాయలుగా నమోదయింది. కిలో వెండి ధర మాత్రం 79,500 రూపాయల వద్ద ట్రెండ్ అవుతుంది.