పర స్త్రీ వ్యామోహంలో భర్త.. తలపై సలసల కాగే నూనె పోసిన భార్య

విజయవాడకు చెందిన చెందిన గిరిధర్‌లాల్‌, రేణుక దంపతులకు ఒక కుమార్తె, ఇద్దరు కుమారులున్నారు. మూడేళ్ల క్రితం బ్రతుకుదెరువు కోసం హైదరాబాద్ లోని జియాగూడకు వచ్చి నివాసం ఉంటున్నారు. మాంసం వ్యాపారం చేసే గిరిధర్ లాల్ జియాగూడ కబేళాలో పనిచేస్తుండేవాడు. కొంత కాలంగా గిరిధర్‌లాల్‌ పరాయి స్త్రీల వ్యామోహంలో పడి భార్య, పిల్లలను నిర్లక్ష్యం చేశాడు. ఈ విషయమై మూడ్రోజులుగా దంపతుల మధ్య గొడవలు జరుగుతున్నాయి. నిన్న కూడా వారిద్దరి మధ్య వాగ్వాదం జరిగింది. భర్త ప్రవర్తనతో విసిగిపోయిన రేణుక.. ఆవేశంలో వంటింట్లో కడాయిలో ఉన్న వేడి నూనెను భర్త తలపై పోసింది. గిరిధర్‌లాల్‌ తల, ఛాతీ, చేతులకు తీవ్ర గాయాలవ్వడంతో స్థానికులు పోలీసులకు సమాచారం అందించి అతన్ని ఉస్మానియా ఆసుపత్రికి తరలించారు. ఘటనా స్థలానికి చేరుకున్న పోలీసులు రేణుకను అదుపులోకి తీసుకుని విచారిస్తున్నారు.