Kamala Harris : కమలా హారిస్ దూకుడుకు ట్రంప్ గ్రాఫ్ పడిపోతుందా?

కమలా హారిస్ బరిలోకి దిగగానే రిపబ్లికన్ పార్టీ అభ్యర్థి డొనాల్డ్ ట్రంప్ కూడా తన ప్రసంగాన్ని మార్చారు. అప్పటి వరకూ బైడన్ విధానాలపై విమర్శలు చేసిన ట్రంప్ హారిస్ బరిలోకి దిగిన వెంటనే ఆమెను వ్యక్తిగతంగా టార్గెట్ చేశారు. ఇది ఎక్కువ మంది అమెరికన్లకు నచ్చడం లేదని అంటున్నారు. కమలా హారిస్ విజయం వైపు దూసుకెళుతున్నట్లు వార్తలు వస్తున్న నేపథ్యంలో ట్రంప్ కూడా తన స్పీడ్ ను పెంచారు. అయితే ట్రంప్ పై గతంలో అధ్యక్షుడిగా పనిచేసినప్పుడు అనేక ఆరోపణలను ఎదుర్కొన్నారు. కాని కమలా హారిస్ పై పాలనపరమైన విమర్శలు లేవు. కేవలం ఆమె భారతీయ సంతతి కుటుంబానికి చెందిన వ్యక్తిగానే ప్రచారం చేయడం మినహా మరొకటి డొనాల్డ్ ట్రంప్ చేయలేకపోతున్నారు.

తాజాగా కమలా హారిస్ అమెరికన్లకు సరికొత్త వాగ్దానాలు చేస్తూ ముందుకు వెళుతున్నారు. తాను అధ్యక్షురాలిగా ఎన్నికయిన వెంటనే వలస విధానాన్ని పరిష్కరిస్తానని చెప్పారు. దీంతో పాటు ఉక్రెయిన్ వంటి దేశాలత పాటు నాటో కూటమికి అండగా ఉంటానని కమలాహారిస్ హామీ ఇచ్చారు. ట్రంప్ పై కూడా కమల నిప్పులు చెరిగారు. ట్రంప్ అధ్యక్షుడిగా ఎన్నికైతే అరాచకాలేనని అన్నారు. దేశంలో అనేక పరిణామాలు సంభవిస్తాయని ప్రజలకు సూచించారు. దేశం మళ్లీ వెనక్కు వెళుతుందని ఆందోళన చెందారు. ట్రంప్ నిలకడలేని మనస్తత్వం కలిగిన వాడని, ఆయన తీసుకునే నిర్ణయాలు దేశభద్రతకు కూడా ముప్పు కలిగిస్తాయని తెలిపారు. డెమొక్రటిక్ పార్టీ జాతీయ సమావేశంలో కమలా హారిస్ ప్రసంగించారు.