ట్విట్టర్ సహ వ్యవస్థాపకుడికీ తప్పని బ్లూటిక్ బెడద.. మస్క్ మామూలోడు కాదు

నేటి నుండి లెగసీ బ్లూటిక్ లను తొలగిస్తామని చెప్పిన ఎలాన్ మస్క్.. అన్నంత పనీ చేసి అందరికీ షాకిచ్చారు. ఇప్పటికే సబ్ స్క్రైబ్ చేసుకున్న ఖాతాలు మినహా.. మిగతా బ్లూ టిక్ ఖాతాలన్నింటికీ ఆ టిక్ ను తొలగించేశారు. ఆఖరికి ట్విట్టర్ సహ వ్యవస్థాపకుడైన జాక్ డోర్సే ను కూడా వదల్లేదు. షారూఖ్ ఖాన్, అమితాబ్ బచ్చన్, రాహుల్ గాంధీ, క్రిస్టియానో రొనాల్డో, బీజేపీ, కాంగ్రెస్, మాయావతి, బీటీఎస్ లాంటి ఎంతో మంది ఖాతాల బ్లూటిక్ లు సైతం ఎగిరిపోయాయి. కొంత కాలం క్రితం వరకు ట్విట్టర్ సీఈవోగా కొనసాగారు జాక్ డోర్సే. అనంతరం ఆయన స్థానంలో భారత సంతతి వ్యక్తి అయిన పరాగ్ అగర్వాల్ సీఈవోగా వచ్చారు. పరాగ్ వచ్చిన కొద్ది రోజులకే ట్విట్టర్ ను ఎలాన్ మస్క్ కొనుగోలు చేసి.. ఊహించని మార్పులు తీసుకొచ్చాడు.