తొమ్మిది దశాబ్దాల భక్త ప్రహ్లాద
టాకీల నిర్మాణం ప్రారంభం కాగానే తెలుగులో కూడా టాకీ చిత్రం రావాలని పలువురు కృషి చేశారు;
ఒకప్పుడు మూకీ సినిమాలు విపరీతంగా ఆడాయి. ఆ తర్వాత మన దేశంలో టాకీల నిర్మాణం ప్రారంభం కాగానే తెలుగులో కూడా టాకీ చిత్రం రావాలని పలువురు కృషి చేశారు. ఆ కృషికి మూలమే 'భక్త ప్రహ్లాద' సినిమా అని అంటూ ఉంటారు. భారతీయ తొలి టాకీ "ఆలం ఆరా" విడుదలైన ఆరు నెలలకు 1931 సెప్టెంబర్ 15 భక్త ప్రహ్లాద విడుదలైంది. తొమ్మిది దశాబ్దాల క్రితం విడుదలైన తెలుగు తొలి టాకీ చిత్రం భక్త ప్రహ్లాద. సెప్టెంబర్ 15, 1931లో విడుదలైంది. ఇది H. M. రెడ్డి దర్శకత్వం వహించిన హిందూ పౌరాణిక చిత్రం. ఇంపీరియల్ ఫిల్మ్ కంపెనీకి చెందిన అర్దేశిర్ ఇరానీ ఈ సినిమాను నిర్మించారు. నిర్మాత అర్దేశీర్ ఇరానీ తన కెరీర్‌ని దక్షిణాదికి విస్తరించాలని భావించి.. అదే సమయంలో తెలుగులో భక్త ప్రహ్లాద చేయడానికి హెచ్‌ఎం రెడ్డిని సంప్రదించారు.
ధర్మవరం రామకృష్ణమాచార్యులు రచించిన భక్త ప్రహ్లాద నాటకాన్ని.. అదే పేరుతో హెచ్‌ఎం రెడ్డి సినిమాగా తీయాలని నిర్ణయించుకున్నారు. ఈ చిత్రంలో సింధూరి కృష్ణారావు ప్రహ్లాద పాత్రలో నటించారు. సురభి కమలాబాయి లీలావతి పాత్రను పోషించి తొలి తెలుగు కథానాయికగా చరిత్రలో నిలిచారు. ఇంద్రుడి పాత్రలో దొరైస్వామి నాయుడు నటించారు. ఎల్వీ ప్రసాద్ ప్రహ్లాదుడి స్నేహితుడి పాత్రలో నటించారు. ఎల్వీ ప్రసాద్ తర్వాత తెలుగులో ప్రముఖ దర్శకుడిగా ఎదిగారు. ఆది ఎం.ఇరానీ ఈ చిత్రానికి సినిమాటోగ్రాఫర్‌గా పని చేయగా, హెచ్‌ఆర్ పద్మనాభ శాస్త్రి సౌండ్‌ట్రాక్ కంపోజ్ చేశారు. ఈ చిత్రం 108 నిమిషాల రన్‌టైమ్‌తో 15 సెప్టెంబర్ 1931న విడుదలైంది. అప్పటి నటీనటులు, సిబ్బంది రోజుకు దాదాపు 20 గంటల పాటు పనిచేశారు. నిర్మాతలు సినిమా బడ్జెట్‌కు దాదాపు 20,000 రూపాయలు ఖర్చు చేశారు. విడుదలైన తర్వాత పెద్ద హిట్‌గా నిలిచింది. అసలు భక్త ప్రహ్లాద నాటకం నుండి గద్యాలను ఉపయోగించడమే కాకుండా, నిర్మాతలు చందాల కేశవదాసు రాసిన కొత్త పాటలను కూడా రూపొందించారు. తొలి తెలుగు గేయ రచయిత చందాల కేశవదాసు అయ్యారు.
తరువాత శోభానాచల ప్రొడక్షన్స్ వారు భక్త ప్రహ్లాదపై మరొక చిత్రాన్ని నిర్మించారు, ఆ రోజుల్లో అధునాతన సాంకేతికతతో భక్త ప్రహ్లాదపై రెండవ తెలుగు చలన చిత్రంగా డబ్ చేయబడింది. 1967లో చిత్రపు నారాయణ మూర్తి భక్త ప్రహ్లాద అనే చిత్రానికి దర్శకత్వం వహించారు, ఇది ప్రజల దృష్టిని మరింత ఆకర్షించింది. రోజా రమణి టైటిల్ రోల్ పోషించగా, ఎస్వీ రంగారావు హిరణ్యకశ్యప పాత్రలో నటించారు. ఇది ఆల్ టైమ్ హిట్స్ లో ఒకటిగా నిలిచిపోయింది.