స్టార్ డైరెక్టర్ మణిరత్నం దర్శకత్వం వహించిన పొన్నియిన్ సెల్వన్-1 అనుకున్న సమయానికంటే ముందే ఓటీటీలోకి వచ్చేసింది. నవంబర్ నెలలో ఓటీటీలో ఈ సినిమా చూడొచ్చని భావించగా.. ఎట్టకేలకు ఈరోజు OTT అరంగేట్రం చేసింది. పీరియాడికల్ యాక్షన్ డ్రామా ఇప్పుడు అమెజాన్ ప్రైమ్ వీడియోలో తమిళం, తెలుగు, మలయాళం మరియు కన్నడ భాషల్లో అందుబాటులో ఉంది. అయితే రూ. 199/- సినిమాకు అద్దె చెల్లించాల్సి ఉంటుంది. ఈ చిత్రం నవంబర్ 4, 2022 నుండి ప్రైమ్ వినియోగదారులందరికీ అందుబాటులో ఉంటుందని OTT ప్లాట్‌ఫారమ్ తెలిపింది.
చియాన్‌ విక్రమ్‌, ఐశ్వర్యరాయ్‌, జయం రవి, త్రిష, కార్తి ప్రధాన పాత్రలు పోషించిన ఈ చిత్రాన్ని లైకా ప్రొడక్షన్స్, మద్రాస్ టాకీస్ బ్యానర్లతో పాటు మణిరత్నం కూడా నిర్మించారు. కల్కి కృష్ణ మూర్తి రాసిన 'పొన్నియన్ సెల్వన్' నవల ఆధారంగా రూపొందించి ఈ సినిమాను రెండు భాగాలుగా విడుదల చేస్తున్నారు. 947-1014లో ప్రఖ్యాత చోళ పాలకుడైన రాజరాజ I జీవితం ఆధారంగా రూపొందించబడింది. దక్షిణ భారతదేశంలో చోళుల పాలనను తిరిగి స్థాపించాడు. మొదటి భాగం సెప్టెంబర్‌ 30న తమిళ్‌, తెలుగు, హిందీ, కన్నడ, మలయాళ భాషల్లో విడుదలైంది. లైకా ప్రొడక్షన్స్‌తో కలిసి మద్రాస్ టాకీస్ ఈ చిత్రాన్ని అత్యంత ఘనంగా నిర్మించారు. ఈ సినిమాకు AR రెహమాన్ సంగీతం అందించారు. మొదట ఈ సినిమా నవంబర్ 18న ఓటీటీలోకి రాబోతోందని ప్రచారం జరిగింది. కానీ అనుకున్న సమయం కంటే చాలా ముందుగానే ఓటీటీలో సందడి చేయడానికి వచ్చేసింది.