ప్రాజెక్ట్ కె.. ఈ రేంజికి వెళుతుందని అసలు అనుకోలేదు

ప్రపంచ వ్యాప్తంగా ఉండే కామిక్ అభిమానులను ఆకట్టుకోడానికి, కొత్త కామిక్స్, సూపర్ హీరో సినిమాలను ప్రమోట్ చేయడానికి ఏర్పాటు చేసే ఈవెంట్ ‘కామిక్ కాన్’. 1970లో అమెరికా కాలిఫోర్నియాలోని శాన్ డియాగో లో కామిక్ కాన్ ఈవెంట్ ని ప్రారంభించారు. ఆ తర్వాత నుండి ఊహించని పాపులారిటీని సొంతం చేసుకుంది. ప్రతి సంవత్సరం ‘కామిక్ కాన్’ ఈవెంట్ ఎంతో గ్రాండ్ గా చేస్తున్నారు. ప్రపంచం నలుమూలల నుంచి అనేకమంది ఈ ఈవెంట్ కి వస్తారు. ఈ ఈవెంట్ లో సినిమా ప్రమోషన్స్, అవార్డ్స్ లాంటివి చాలా ఉంటాయి. ఇలాంటి చోట సినిమాను ప్రమోట్ చేస్తే తప్పకుండా సినిమా ప్రపంచవ్యాప్తంగా ఉన్న సినీ జనాలకు చేరుతుందని భావిస్తూ ఉంటారు. ఆ ప్లాన్ తోనే ప్రాజెక్ట్ కె చిత్రం కామిక్ కాన్ ను ఎంపిక చేసుకుంది.

‘కామిక్ కాన్’ ఈవెంట్ లో పాల్గొనబోయే మొదటి తెలుగు సినిమా ప్రాజెక్ట్ K అని అంటున్నారు. ఈ సినిమాని ప్రమోట్ చేస్తే హాలీవుడ్ లో మార్కెట్ సంపాదించొచ్చు. ఈ ఏడాది జూలై 19 నుంచి 23 వ‌ర‌కు 5 రోజుల పాటు జ‌ర‌గ‌నున్న వేడుక‌లో ‘ప్రాజెక్ట్ K’ సినిమా టైటిల్‌, గ్లింప్స్‌ను ప్ర‌ద‌ర్శించ‌నున్నారు. దీనికి సంబంధించి మేక‌ర్స్ ఓ పోస్ట‌ర్‌ను కూడా విడుద‌ల చేశారు.