తప్పులు చేయడమన్నది మానవుల నైజం. ఆ తప్పు తెలుసుకుని క్షమాపణలు కోరడం గొప్పతనం. ఓ వ్యక్తి గుడిలో దొంగతనానికి పాల్పడ్డాడు. ఆ తర్వాత తన తప్పును తెలుసుకున్నాడు. దీంతో దొంగిలించిన వస్తువులను తిరిగి ఇచ్చేసి.. క్షమాపణ కోరుతూ లేఖను పంపాడు. ఈ ఘటన మధ్యప్రదేశ్ రాష్ట్రంలో చోటు చేసుకుంది. మధ్యప్రదేశ్‌లోని బాలాఘాట్ జిల్లాలోని ఒక ఆలయంలో దొంగిలించిన వెండి, ఇత్తడి వస్తువులను ఒక దొంగ తిరిగి ఇచ్చేశాడు. తాను చేసిన ఈ పని కారణంగా తనకు ఎంతో బాధ కలిగించిందని క్షమాపణ లేఖతో పాటు తిరిగి ఇచ్చాడని పోలీసులు తెలిపారు. అక్టోబరు 24న లమ్టా పోలీస్ స్టేషన్ పరిధిలోని శాంతినాథ్ దిగంబర్ జైన్ టెంపుల్ నుంచి 'ఛత్రాలు', మూడు ఇత్తడి వస్తువులతో సహా 10 అలంకారమైన వెండి వస్తువులను గుర్తుతెలియని వ్యక్తి దొంగిలించాడని అదనపు పోలీసు సూపరింటెండెంట్ విజయ్ దాబర్ తెలిపారు. అప్పటి నుంచి నిందితుడి కోసం పోలీసులు గాలిస్తున్నారు.