Temperatures : ఎండలు.. వడగాలులు.. మార్చి నెలలోనే మాడు పగిలిపోతుందే?

ఇంత స్థాయిలో గరిష్ట ఉష్ణోగ్రతలు గతంలో మార్చి నెలలో నమోదు కాలేదని వాతావరణ శాఖ అధికారులు చెబుతున్నారు. మార్చి చివరి నాటికే నలభై డిగ్రీలు దాటిపోవడం ఇదే తొలిసారి అని అంటున్నారు. మరో మూడు రోజులు ఎండల తీవ్రత మరింత ఎక్కువవుతుందని అంటున్నారు. బయటకు వచ్చే వారు జాగ్రత్తలు తీసుకోకుంటే వడదెబ్బ తగిలే అవకాశముందని హెచ్చరిస్తున్నారు. మంచినీళ్లు ఎక్కువగా తాగుతూ డీ హైడ్రేషన్ కు లోను కాకుండా చూసుకోవాలని వైద్య నిపుణులు సూచిస్తున్నారు.

సాధారణ డిగ్రీలతో పోలిస్తే ఇప్పటికే రెండు నుంచి మూడు డిగ్రీల ఉష్ణోగ్రతలు అధికంగా నమోదవుతున్నాయి. ఎల్‌నినో ప్రభావం కారణంగానే ఈ పరిస్థితి అని వాతావరణ శాఖ అధికారులు చెబుతున్నారు. ఏప్రిల్, మే నెలల్లో ఎండల తీవ్రత మరింత అధికమయ్యే అవకాశముందని వాతావరణ శాఖ హెచ్చరికలు జారీ చేస్తుంది. ప్రధానంగా తెలంగాణలోని ఆదిలాబాద్, ఖమ్మం, నిజామాబాద్, కరీంనగర్, నల్లగొండ జిల్లాల్లో ఎండల తీవ్రత అధికంగా ఉంటుందని వాతావరణ శాఖ అధికారులు చెబుతున్నారు. ఇప్పటికే వాతావరణ శాఖ ఆరెంజ్ అలెర్ట్ జారీ చేసింది.