బీజేపీ టికెట్ల కోసం 119 నియోజకవర్గాలకు 6 వేల దరఖాస్తులు

అసెంబ్లీ ఎన్నికలు దగ్గర పడుతున్న తరుణంలో తెలంగాణలో రాజకీయాలు జోరందుకున్నాయి. బీజేపీ, బీఆర్ఎస్, కాంగ్రెస్ పార్టీలు ఎన్నికల ప్రక్రియలో స్పీడ్ పెంచాయి. ప్రధానంగా.. తెలంగాణలో బీజేపీ వేగం పెంచింది. ఎలాగైనా వచ్చే ఎన్నికల్లో కేసీఆర్‌ ప్రభుత్వాన్ని పడగొట్టాలని ప్రణాళికలు రచిస్తోంది. ఈ ఎన్నికల్లో తెలంగాణలో జెండా ఎగురవేయాలని కమలం భావిస్తోంది. ఈ మేరకు క్షేత్రస్థాయి నుంచి వ్యూహాలు రచిస్తోంది.. సునీల్ బన్సల్ నేతృత్వంలో బీజేపీ వ్యూహలను రచిస్తోంది. ఈ క్రమంలోనే.. రాబోయే అసెంబ్లీ ఎన్నికల్లో పోటీ చేసేందుకు ఆశావాహుల నుంచి ధరఖాస్తులు స్వీకరించారు బీజేపీ నేతలు. దీంతో తెలంగాణలో బీజేపీ ఎమ్మెల్యే టిక్కెట్‌లకు భారీ పోటీ నెలకొంది. వచ్చే అసెంబ్లీ ఎన్నికల్లో బీజేపీ నుంచి పోటీ చేసేవారి దరఖాస్తులు వరదలా వచ్చి చేరుతున్నాయి. ఆశావహుల నుంచి గత వారం రోజులుగా బీజేపీ దరఖాస్తుల స్వీకరణ చేపట్టగా.. నిన్నటితో అప్లికేషన్స్‌కు గడువు ముగిసింది. అయితే.. ఎమ్మెల్యే టికెట్ల కోసం ఆశావహులు భారీగా పోటీ పడ్డారు. 119 సీట్లకు 6వేలకు పైగా దరఖాస్తులు రావడం ఆసక్తి రేపుతోంది.