4.5 లక్షల బస్తాల బియ్యం మిస్సింగ్: కేంద్రం

హైదరాబాద్ : వరి ధాన్యం కొనుగోళ్ల విషయంలో కేంద్ర ప్రభుత్వం, తెలంగాణ రాష్ట్రం మధ్య పచ్చగడ్డి వేస్తే భగ్గుమంటోంది. ఇలాంటి తరుణంలో రైస్‌మిల్లర్ల వైపు కేంద్రం మెల్లగా దృష్టి సారిస్తోంది. ఫుడ్ కార్పొరేషన్ ఆఫ్ ఇండియా రాండమ్ ఫిజికల్ వెరిఫికేషన్‌లో రైస్ మిల్లర్లు చేసిన ఆరోపణలపై సీబీఐ విచారణ జరిపించాలని డిమాండ్ చేస్తూ ఇటీవల టీపీసీసీ అధ్యక్షుడు రేవంత్ రెడ్డి కేంద్ర పర్యాటక, సాంస్కృతిక శాఖ మంత్రి కిషన్ రెడ్డికి లేఖ రాశారు. రాష్ట్రంలోని 40 రైస్‌ మిల్లుల్లో.. ఒక్కొక్కటి 40 కిలోల బరువున్న 4,53,896 బస్తాల బియ్యం మాయమైనట్లు గుర్తించారు. ఈ విషయమై గవర్నర్ డాక్టర్ తమిళిసై సౌందరరాజన్‌కు కూడా ఫిర్యాదు చేశారు. కాంగ్రెస్ నేత లేఖపై కిషన్ రెడ్డి బుధవారం స్పందిస్తూ.. రాష్ట్ర ప్రభుత్వం సీబీఐ విచారణ కోరితే కేంద్రం సాయం చేస్తుందని అన్నారు. రాష్ట్ర ప్రభుత్వం ఒప్పందాలు కుదుర్చుకున్న రైస్ మిల్లులపై కేంద్రానికి ఎటువంటి అధికార పరిధి లేనందున నేరుగా జోక్యం చేసుకోలేమని ఆయన అన్నారు.