పక్కా ప్లాన్.. వాట్సప్ గ్రూప్ క్రియేట్ చేసుకుని?

తెలంగాణంలో దాదాపు 2,500 మంది ఆర్మీ అభ్యర్థులు ఉన్నారు. వీరంతా ఒక వాట్సాప్ గ్రూపు క్రియేట్ చేసుకున్నారు. ఈరోజు ఉదయం సికింద్రాబాద్ స్టేషన్ కు రావాలని వారంతా ప్లాన్ చేసుకున్నారు. నిన్న రాత్రి చాలా మంది సికింద్రాబాద్ రైల్వే స్టేషన్ పరిసర ప్రాంతాలకు చేరుకున్నారు. ఉదయాన్నే రైల్వే స్టేషన్ కు అన్ని ప్రాంతాల నుంచి ఆర్మీ అభ్యర్థులు చేరుకున్నారు. వాట్సప్ గ్రూపు క్రియేట్ చేసుకుని తెలంగాణ నలుమూలల నుంచి ఆర్మీ అభ్యర్థులు వస్తున్నా ఇంటలిజెన్స్ పసిగట్ట లేకపోయింది.

వాళ్లంతా తొలుత రైళ్లు ఆపి తమ నిరసనను తెలియజేయాలని భావించారు. ఉదయం ఆరు గంటలకు చేరుకున్న ఆందోళనకారులు నిరసనను వ్యక్తం చేస్తున్నారు. కానీ పోలీసులు లాఠీ ఛార్జి చేయడంతో ఒక్కసారిగా హింసకు దిగారు. అందిన వస్తువులను అందినట్లు చిందరవందరగా పడేశారు. దాదాపు రెండు గంటల పాటు రైల్వే స్టేషన్ లో విధ్వసం సృష్టించారు. లాఠీ ఛార్జి చేయకుండా ఉంటే శాంతియుతంగా నిరసనతెలిపి ఉండేవారమని వారు చెబుతున్నారు. కానీ వేలాది మంది ఉండటంతో ఆందోళన వారి చేతులను దాటిపోయింది. పోలీసులు కాల్పులు జరిపే పరిస్థితి ఏర్పడింది. ఒకరి మృతికి కారణమయింది.