అలా అన్నీ కలిసొచ్చేసాయ్!

తేజ సజ్జ హీరోగా ప్రశాంత్ వర్మ దర్శకత్వంలో వచ్చిన హనుమాన్ సంచలన విజయం దిశగా దూసుకెళ్తోంది. తక్కువ బడ్జెట్తో నిర్మించిన ఈ చిన్న చిత్రం భారీ లాభాలను సొంతం చేసుకోబోతోంది.  శుక్రవారమే విడుదలైన సూపర్ స్టార్ మహేష్ బాబు నటించిన గుంటూరు కారం సినిమాకు యావరేజ్ టాక్ రావడం హనుమాన్ కి మరింత కలసి రానుంది. కలిసొచ్చే కాలానికి నడిచొచ్చే కొడుకు పుడతాడు అన్నట్లు ఆంజనేయుడికి సినిమాకు చాలా విషయాలు కలసి వస్తున్నాయి. పండగల సమయం కావడం, పిల్లల్ని అలరించే భారతీయ సూపర్ మ్యాన్ కథ కావడం, తక్కువ ఖర్చులో మంచి గ్రాఫిక్స్ తో సినిమాను పూర్తి చేయడం ఆంజనేయుడు బలాన్ని మరింత పెంచుతున్నాయి.

ఈ నెల 22వ తేదీ నాడు అయోధ్యలో రామ మందిర ప్రారంభోత్సవం కూడా ప్రశాంత్ వర్మ సినిమాకు మరింత లాభం చేకూర్చనుంది. దేశమంతా రామనామం జపం జరుగుతున్న వేళ హనుమంతుడి వెండి తెర విశ్వరూపాన్ని ఈ సినిమా ద్వారా  దేశ ప్రజలు, లాభాల ద్వారా నిర్మాతలు చూడబోతున్నారు. రామనామం ఎక్కడుంటే నేనక్కడుంటాను అని హనుమంతుడు అంటాడు. మరో కొన్ని నెలల పాటు దేశమంతా రామనామం ఉంటుంది. అక్కడ రాముని భక్తుడు హనుమంతుడితో పాటు, హనుమాన్ చిత్రం ప్రస్తావన కూడా ఉంటుంది.

మొదటి షో నుంచే పాజిటివ్ టాక్ సొంతం చేసుకున్న ఈ రామభక్తుని చిత్రం.. ఈ పండుగల్లో పిల్లా, పెద్దా ఖచ్చితంగా చూడాలనుకునే సినిమా అయిపోయింది. ఈ విషయంలో దర్శకుడు ప్రశాంత్ వర్మకి కంగ్రాట్స్ చెప్పాలి. ఒక సినిమా తీయడానికి వందల కోట్లు, భారీ హీరోలు, పెద్ద పెద్ద టెక్నిషన్స్, కళ్ళు చెదిరే గ్రాఫిక్స్ అవసరం లేదని ఆయన ప్రూవ్ చేసాడు. పరిమిత తక్కువ బడ్జెట్ లోనే అద్భుతమైన సినిమాలు తీయవచ్చని, కంటెంట్ మాత్రమే సినిమా విజయానికి ముఖ్యమని హునుమాన్ చూపించి మరీ  తేల్చి చెప్పాడు.  ప్రశాంత్ వర్మ కోసం ఇక పెద్ద హీరోలు కాల్ షీట్స్ రెడీ చేసుకున్నా ఆశ్చర్యపోనక్కర్లేదు. అన్నట్లు ఈ సినిమాను ప్రమోట్ చేసిన ఆయన పేరు కూడా హనుమాన్.. అంటే చిరంజీవి. మరో పేరు కూడా ఆయనకు ఉందండోయ్.. మెగాస్టార్.