జలగం అందుకు అంగీకరిస్తారా?

కొత్తగూడెంలో గత ఎన్నికల్లో టీఆర్ఎస్ తరుపున జలగం వెంకట్రావు పోటీ చేసి ఓటమి పాలయ్యారు. కాంగ్రెస్ నుంచి గెలిచిన వనమా వెంకటేశ్వరరావు ఎన్నికలు పూర్తయిన తర్వాత గులాబీ పార్టీ తీర్థం పుచ్చుకున్నారు. అప్పటి నుంచి జలగం వెంకట్రావు కొంత అసంతృప్తికి గురయ్యారు. జలగం కుటుంబానికి రాష్ట్ర వ్యాప్తంగానే మంచి పేరుంది. వనమాను పార్టీలో చేర్చుకోవడంపై ఆయన అప్పట్లోనే వ్యతిరేకించారు.

అందుకే ఆయన కాంగ్రెస్ లో చేరిపోవాలని ఒక దశలో భావించారు. కాంగ్రెస్ అయితేనే బెటర్ అన్న భావనలో జలగం వెంకట్రావు ఉండి, టీఆర్ఎస్ కార్యక్రమాలకు దూరంగా ఉన్నారు. కొత్తగూడెంలో జలగం వెంకట్రావు, వనమా వెంకటేశ్వరరావు వర్గాలకు అస్సలు పడదు. పార్టీ అధిష్టానం నచ్చ చెప్పే ప్రయత్నం చేసినా రాజీ కుదరలేదు. పదవుల విషయంలోనూ జలగం వెంకట్రావు పెద్దగా పట్టించుకోలేదు.

అయితే తాజాగా వనమా రాఘవ ఎపిసోడ్ తో వనమా ఫ్యామిలీ పూర్తిగా రాజకీయంగా కనుమరుగైనట్లే. ఎన్నికలకు ఏడాది ముందే ఇది జరగడంతో ప్రజలు దీనిని అంత తేలిగ్గా మర్చిపోలేరు. టీఆర్ఎస్ అధిష్టానం ఇప్పటికే రాఘవను పార్టీ నుంచి సస్పెండ్ చేసింది. వనమా కూడా ఆరోగ్య పరిస్థితుల దృష్ట్యా ఫిట్ గా లేరు. దీంతో జలగం వెంకట్రావును మళ్లీ యాక్టివ్ చేయాలని టీఆర్ఎస్ అధిష్టానం భావిస్తుంది. మరి జలగం దీనికి ఏమంటారన్నది ఆసక్తికరంగా మారింది.