తెలంగాణకు ఆక్సిజన్ వచ్చేసింది

ఆక్సిజన్ కొరతతో అల్లాడుతున్న తెలంగాణలోని కరోనా రోగులకు గుడ్ న్యూస్. ప్రాణవాయువు కోసం పోరాడుతున్న వారి కోసం ఒడిశా నుంచి ఆక్సిజన్ ట్యాంకర్లు రాష్ట్రానికి చేరుకున్నాయి. రెండ్రోజుల క్రితం బేగంపేట విమానాశ్రయం నుంచి యుద్ధ విమానాల ద్వారా వెళ్లిన ట్యాంకర్లు సోమవారం సాయంత్రం హైదరాబాద్‌ చేరుకున్నాయి. 150 మెట్రిక్ టన్నుల ఆక్సిజన్‌ కోసం తెలంగాణ ప్రభుత్వం 9 ట్యాంకర్లను ఒడిశాకు పంపగా… తొలి విడతగా ఐదు ఆక్సిజన్ ట్యాంకర్లు హైదరాబాద్ చేరుకున్నాయి. మిగిలిన ట్యాంకర్లు ఒడిశాలోని అంగుల్, రూర్కెలా స్టీల్ ప్లాంట్ల నుంచి తెలంగాణకు వస్తున్నాయి. ఒక్కో ట్యాంకర్‌లో 16 మెట్రిక్ టన్నుల ఆక్సిజన్ ఉంటుంది.యుద్ధ విమానాల్లో ఒడిశాకు వెళ్లిన ట్యాంకర్లు ఆక్సిజన్ నింపుకుని రోడ్డు మార్గం ద్వారా తెలంగాణకు చేరుకున్నాయి. గచ్చిబౌలిలోని టిమ్స్ ఆస్పత్రికి చేరుకున్న ట్యాంకర్లను కరీంనగర్, చర్లపల్లి, కింగ్ కోఠి, ఛాతీ ఆస్పత్రి, ఖమ్మంలోని పలు ఆస్పత్రులకు ఆక్సిజన్ సరఫరా చేయనున్నాయి. ఆ ట్యాంకర్ల రాకతో రాష్ట్రంలో ఆక్సిజన్ కొరత కాస్త తగ్గినట్లే భావించాలి. రవాణా శాఖ సమకూర్చిన ఈ ట్యాంకర్లను ఆర్టీసీ డ్రైవర్లు సురక్షితంగా హైదరాబాద్‌కు చేరవేశారు.