యాదగిరి గుట్టలో ఆర్జిత సేవలు నిలిపివేత

ప్రముఖ పుణ్యక్షేత్రమైన యాదాద్రి లక్ష్మీనారసింహస్వామి ఆలయ ఉద్యోగులు, అర్చకుల్లో 30మందికి కరోనా పాజిటివ్‌ నిర్ధారణ అయిందని ఆలయ ఈవో గీతారెడ్డి తెలిపారు. ఇటీవల జరిగిన ఆలయ వార్షిక బ్రహ్మోత్సవాలలో పాల్గొనేందుకు వివిధ ప్రాంతాల నుంచి పెద్ద సంఖ్యలో భక్తులు తరలివచ్చారు. ఈ క్రమంలో వారి నుంచి విధుల్లో ఉన్న ఆలయ సిబ్బందికి వైరస్‌ సోకి ఉంటుందని భావిస్తున్నట్లు ఆమె తెలిపారు. ఆలయ సిబ్బందికి కొవిడ్‌ నిర్ధారణ కావడంతో స్వామివారి ఆర్జిత సేవలను ఆదివారం నుంచి నిలిపేయాలని నిర్ణయం తీసుకున్నామన్నారు. కేవలం దైవదర్శనాలకు మాత్రమే భక్తులను అనుమతిస్తామని స్పష్టం చేశారు. మరోవైపు యాదగిరిగుట్ట మండలంలోని మల్లాపురం గ్రామానికి చెందిన 16మందికి, యాదగిరిగుట్ట పట్టణానికి చెందిన మరో ఇద్దరికి పాజిటివ్‌గా తేలిందని వైద్యాధికారులు వెల్లడించారు.