Tirumala : 31 కంపార్ట్‌మెంట్లలో భక్తులు.. దర్శనానికి ఎంత సమయం అంటే?

తిరుమలలో ఒక్కసారిగా భక్తుల రద్దీ పెరగడానికి ఇతర రాష్ట్రాల నుంచి భక్తులు అధిక సంఖ్యలో రావడమే కారణమని టీటీడీ అధికారులు చెబుతున్నారు. స్పెషల్ దర్శనం కంటే ఉచిత దర్శనం క్యూ లైన్ లో భక్తులు ఎక్కువగా కనిపిస్తున్నారు. అందుకే కంపార్ట్‌మెంట్లన్నీ భక్తులతో నిండిపోతున్నాయి. ప్రతి రోజూ ఇదే పరిస్థితి నెలకొంది. ఈరోజు తిరుమలలోని వైకుంఠం క్యూ కాంప్లెక్స్ లోని 31 కంపార్ట్‌మెంట్లలో భక్తులు శ్రీవారి దర్శనం కోసం వేచి ఉన్నారు. ఉచిత దర్శనం క్యూ లైన్ లో ఉదయం టోకెన్లు లేకుండా ప్రవేశించిన భక్తులకు శ్రీవారి దర్శనం పద్దెనిమిది గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు ఐదు గంటల సమయం పడుతుండగా, మూడు వందల రూపాయల ప్రత్యేక దర్శనం టిక్కెట్లను కొనుగోలు చేసిన భక్తులకు మూడు నుంచి నాలుగు గంటల సమయం పడుతుందని అధికారులు వెల్లడించారు. నిన్న తిరుమల శ్రీవారిని 78,690 మంది భక్తులు దర్శించుకున్నారు. వీరిలో 26,086 మంది భక్తులు తమ తలనీలాలను సమర్పించుకుని తమ మొక్కులు చెల్లించుకున్నారు. ఇక నిన్న తిరుమల శ్రీవారి హుండీ ఆదాయం 4.18 కోట్ల రూపాయల ఆదాయం వచ్చిందని అధికారులు వెల్లడించారు.