Tirumala : తిరుమలలో శనివారం కూడా రద్దీ తగ్గడానికి రీజన్ ఇదేనా?

తిరుమలలో శనివారం అంటే భక్తుల రద్దీ ఎక్కువగా ఉంటుందని అధికారులు అందుకు తగిన ఏర్పాట్లు చేస్తారు. కానీ ఈ శనివారం మాత్రం రష్ పెద్దగా లేకపోవడంపై అధికారులే ఆశ్చర్యం వ్యక్తం చేస్తున్నారు. ఈరోజు తిరుమల వైకుంఠం క్యూ కాంప్లెక్స్‌లోని పన్నెండు కంపార్ట్‌మెంట్లలోనే భక్తులు శ్రీవారి దర్శనం కోసం వేచి చూస్తున్నారు. ఉచిత దర్శనం క్యూ లైన్ లో ఉన్న భక్తులకు శ్రీవారి దర్శనం కేవలం ఎనిమిది గంటల సమయం మాత్రమే పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ టోకెన్లున్న భక్తులకు శ్రీవారి దర్శనం కేవలం మూడు గంటల్లోనే పూర్తవుతుంది. మూడు వందల రూపాయల టిక్కెట్లు కొనుగోలు చేసిన భక్తులకు శ్రీవారి దర్శనం రెండు నుంచి మూడు గంటల సమయం పడుతుందని టీటీడీ అధికారులు తెలిపారు. నిన్న తిరుమల శ్రీవారిని 64,158 మంది భక్తులు దర్శించుకున్నారు. వీరలో 24,938 మంది భక్తులు తమ తలనీలాలను సమర్పించుకుని మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 3.31 కోట్ల రూపాయలు మాత్రమే వచ్చిందని, ఈ నెలలో అత్యంత తక్కువగా నిన్ననే హుండీ ఆదాయం వచ్చిందని అధికారులు తెలిపారు.