Tirumala : తిరుమలలో నేడు పెరిగిన భక్తుల రద్దీ.. దర్శన సమయం ఎంతంటే?

ఈరోజు తిరుమల శ్రీవారి ఆలయంలో దీపావళి ఆస్థానం జరగనుంది. దీంతో ఆర్జిత సేవలను రద్దు చేశారు. దీంతో పాటు వీఐపీ బ్రేక్ దర్శనాలు కూడా తిరుమల తిరుపతి దేవస్థానం అధికారులు రద్దు చేసింది. మామూలు దర్శనాలు మాత్రం యధాతధంగా ఉంటాయని టీటీడీ అధికారులు తెలిపారు. దీపావళి రోజు స్వామి వారిని దర్శించుకుంటే మంచిదన్న కారణంతో ఎక్కువ మంది భక్తులు తిరుమలకు చేరుకున్నారు. ఈరోజు తిరుమలలోని వైకుంఠం క్యూ కాంప్లెక్స్ లోని పది కంపార్ట్‌మెంట్లలో భక్తులు స్వామి వారి దర్శనం కోసం వేచి ఉన్నారు. ఉచిత దర్శనం క్యూ లైన్ లో ఉదయం ఏడు గంటలకు టోకెన్లు లేకుండా ప్రవేశించిన భక్తులకు శ్రీవారి దర్శనం పన్నెండు గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు శ్రీవారి దర్శనం నాలుగు గంటలకు పైగానే పడుతుంది. మూడు వందల రూపాయల ప్రత్యేక దర్శనం టిక్కెట్లను కొనుగోలు చేసిన భక్తులకు శ్రీవారి దర్శనం రెండు నుంచి మూడు గంటల సమయం పడుతుందని అధికారులు తెలిపారు. నిన్న తిరుమల శ్రీవారిని 55,219 మంది భక్తులు దర్శించకున్నారు. వీరిలో 16,211 మంది భక్తులు తమ తలనీలాలను సమర్పించుకున్నారు. నిన్న తిరుమల శ్రీవారి హుండీ ఆదాయం 4.37 కోట్ల రూపాయలు వచ్చిందని అధికారులు తెలిపారు.