నారా లోకేష్ విచారణ అప్పుడే

ఇన్నర్ రింగ్ రోడ్డు వ్యవహారంలో ఏపీ సీఐడీ అధికారులు టీడీపీ జాతీయ ప్రధాన కార్యదర్శి నారా లోకేశ్ కు ఇటీవల 41ఏ కింద నోటీసులు ఇవ్వడం తెలిసిందే. లోకేశ్ అక్టోబరు 4న విచారణకు హాజరు కావాలంటూ ఆ నోటీసుల్లో తెలిపారు. ఈ నోటీసుల్లోని కొన్ని అంశాలపై లోకేశ్ అభ్యంతరం వ్యక్తం చేస్తూ ఏపీ హైకోర్టులో లంచ్ మోషన్ పిటిషన్ దాఖలు చేశారు. లోకేశ్ పిటిషన్ పై విచారణ చేపట్టిన హైకోర్టు ఇరు వర్గాల వాదనలు విన్నది. లోకేశ్ పై రేపటి సీఐడీ విచారణను ఈ నెల 10కి వాయిదా వేసింది. ఈ మేరకు ఏపీ సీఐడీకి ఆదేశాలు ఇచ్చింది. 10వ తేదీన లోకేశ్ సీఐడీ విచారణకు హాజరు కావాలని స్పష్టం చేసింది.

ఉదయం 10 గంటల నుంచి సాయంత్రం 5 గంటల వరకు మాత్రమే విచారించాలని హైకోర్టు ధర్మాసనం తన ఆదేశాల్లో పేర్కొంది. సీఐడీ అధికారులు విచారణ జరిపే సమయంలో లోకేశ్ న్యాయవాదిని కూడా అనుమతించాలని.. మధ్యాహ్నం గంట సేపు లంచ్ బ్రేక్ ఇవ్వాలని పేర్కొంది. ఇన్నర్ రింగ్ రోడ్డు కేసులో విచారణకు హాజరయ్యేటప్పుడు హెరిటేజ్ సంస్థ లావాదేవీలకు సంబంధించిన వివరాలు, అకౌంటు పుస్తకాలు తీసుకురావాలని ఇటీవల సీఐడీ తన నోటీసుల్లో కోరగా.. హెరిటేజ్ ఫుడ్స్ లో డైరెక్టర్ పదవికి తాను ఎప్పుడో రాజీనామా చేశానని లోకేశ్ సమాధానం ఇచ్చారు.