అనకాపల్లి జిల్లాలో ట్రైన్ యాక్సిడెంట్

వరుసగా రైలు ప్రమాదాలు ప్రజలను భయభ్రాంతులకు గురిచేస్తూ ఉన్నాయి. అనకాపల్లి జిల్లాలో తాజాగా గూడ్స్‌ రైలు పట్టాలు తప్పింది. బొగ్గు లోడుతో వెళ్తున్న గూడ్స్‌ రైలు తాడి-అనకాపల్లి స్టేషన్ల మధ్య తెల్లవారుజామున 3.35 గంటలకు పట్టాలు తప్పింది. దీంతో విశాఖపట్నం-విజయవాడ మార్గంలో పలు రైళ్ల రాకపోకలకు అంతరాయం కలిగింది. కొన్ని రైళ్లను రద్దు చేయగా మరికొన్ని ఆలస్యంగా నడుస్తున్నాయి. విశాఖ- లింగంపల్లి(12805)-జన్మభూమి, విశాఖ-విజయవాడ (22701)-ఉదయ్‌, విశాఖ-గుంటూరు(17240)- సింహాద్రి ఎక్స్‌ప్రెస్‌ రైళ్లను నేడు రద్దు చేశారు. ఆ రైళ్ల తిరుగు ప్రయాణం కూడా రద్దయింది. విశాఖ- సికింద్రాబాద్‌ (20833)-వందేభారత్‌ ఎక్స్‌ప్రెస్‌ మూడు గంటలు ఆలస్యంగా వెళ్లనుంది. విశాఖ నుంచి ఉదయం 5.45కి బయల్దేరాల్సిన వందేభారత్‌.. 8.45కి బయల్దేరనుంది. విశాఖతోపాటు దువ్వాడ రైల్వే స్టేషన్లలో పలు రైళ్లు నిలిచి పోయాయి.