ఏపీలో ఫేక్ యూనివర్సిటీలు ఉన్నాయ్.. జర జాగ్రత్త..?

ఆంధ్రప్రదేశ్ లోని రెండు యూనివర్సిటీలు నకిలీవి ఉన్నాయని యూనివర్సిటీ గ్రాంట్స్ కమిషన్ (యూజీసీ) తేల్చింది. ఆ కాలేజీలకు డిగ్రీలు ప్రధానం చేసే అధికారం లేదని స్పష్టం చేసింది. ఆ యూనివర్సిటీలు జారీ చేసే డిగ్రీలతో ఉన్నత విద్యకు, ఉద్యోగాలకు దరఖాస్తు చేసుకునే అవకాశం లేదని.. యూజీసీ చట్టంలోని నిబంధనలకు విరుద్ధంగా వాటిని నిర్వహిస్తున్నట్లు గుర్తించినట్లు అధికారులు ప్రకటనలో తెలిపారు. ఆంధ్రప్రదేశ్ రాష్ట్రంలోని గుంటూరు జిల్లా కాకుమానివారితోటలో క్రైస్ట్ న్యూ టెస్టమెంట్ డీమ్డ్ యూనివర్సిటీతో పాటు విశాఖపట్నంలోని బైబిల్ ఓపెన్ యూనివర్సిటీ ఆఫ్ ఇండియాలను యూజీసీ నకిలీ యూనివర్సిటీలుగా ప్రకటించింది. దీంతో పాటు దేశవ్యాప్తంగా మొత్తం 20 ఫేక్ యూనివర్సిటీలను గుర్తించినట్లు తెలిపింది. దేశ రాజధాని ఢిల్లీలోనే 8 నకిలీ యూనివర్సిటీలు ఉన్నాయని పేర్కొంది. ఉన్నత విద్య కోసం యూనివర్సిటీలలో చేరేముందు సదరు యూనివర్సిటీకి యూజీసీ గుర్తింపు ఉన్నది లేనిదీ చెక్ చేసుకోవాలని విద్యార్థులను యూజీసీ హెచ్చరించింది.