విదేశీ హై గ్రేడ్ గంజాయి..సీజ్ చేసిన అధికారులు

అమెరికా నుంచి వచ్చిన ఓ కొరియర్ చూడ్డానికి అనుమానాస్పదంగా ఉండటంతో.. ఎన్సీబీ అధికారులకు ఆ కొరియర్ సంస్థ ప్రతినిధులు సమాచారం ఇచ్చారు. అధికారులు ఆ పార్శిల్ ను ఓపెన్ చేసి చూస్తే.. 1420 గ్రాముల గంజాయి బయటపడింది. అది కూడా అమెరికాలో పండించిన హైగ్రేడ్ గంజాయి. దాని విలువ మార్కెట్ లో సుమారు రూ.15 లక్షల వరకూ ఉంటుందని అధికారులు అంచనా వేశారు.

అధికారుల తనిఖీల్లో పట్టుబడిన ఆ గంజాయిని హైదరాబాద్ లోని కాలేజీ విద్యార్థులు, వివిధ సంస్థల్లో పనిచేసే అధికారులకు అమ్ముతున్నట్లు తెలిసింది. ఆ పార్శిల్ పై ఉన్న అడ్రస్ ఆధారంగా ఎన్సీబీ అధికారులు ఇద్దరు నిందితులను అరెస్ట్ చేశారు. వారు గతంలో చాలాసార్లు అమెరికా నుంచి గంజాయిని దిగుమతి చేసుకుని అమ్మినట్లు విచారణలో తేలింది. డార్క్ నెట్ ద్వారా గంజాయి ఆర్డర్ చేసి, కాలేజీ విద్యార్థులే టార్గెట్ గా ఈ దందా చేస్తున్నట్లు ఎన్సీబీ అధికారులు వెల్లడించారు.