బీహార్ పేలుడు ఘటన : 14కి చేరిన మృతుల సంఖ్య

భాగలాపూర్ : బీహార్ లోని భాగలాపూర్ ప్రాంతంలో శుక్రవారం తెల్లవారుజామున భారీ పేలుడు సంభవించిన విషయం తెలిసిందే. ఈ పేలుడులో మృతుల సంఖ్య క్రమంగా పెరుగుతోంది. ఇప్పటివరకూ 14 మంది చనిపోగా.. 10 మందికి గాయాలయ్యాయి. మృతుల్లో ఒకే కుటుంబానికి చెందిన ఐదుగురు ఉన్నట్లు గుర్తించారు. ఈ పేలుడు ఘటనపై ఏటీఎస్ నేతృత్వంలో విచారణ జరుగుతోంది. ప్రమాద ఘటనపై ప్రధాని మోదీ ఆరా తీశారు. బీహార్ సీఎం నితీష్ కుమార్ కు ఫోన్ చేసి.. ప్రమాదానికి గల కారణాలు, సహాయక చర్యలపై సమాచారం అడిగి తెలుసుకున్నారు. క్షతగాత్రులను జవహర్ లాల్ నెహ్రూ మెడికల్ కాలేజీ ఆస్పత్రికి తరలించారు.