మహారాష్ట్రలోని పాల్ఘర్ జిల్లా బోయిసర్ పట్టణంలోని తారాపూర్ ఎంఐడీసీ వద్ద గల రసాయన కర్మాగారంలో బుధవారం జరిగిన పేలుడులో కనీసం ముగ్గురు కార్మికులు మృతి చెందగా, మరో 12 మంది గాయపడినట్లు అధికారులు తెలిపారు. వస్త్ర పరిశ్రమలో ఉపయోగించే గామా యాసిడ్‌ను ఉత్పత్తి చేసే యూనిట్‌లో సాయంత్రం 4.20 గంటలకు ఈ ఘటన జరిగిందని వారు తెలిపారు. పేలుడు తీవ్రతకు ప్లాంట్ పైకప్పు లేచిపోయిందని అధికారులు తెలిపారు. "కెమికల్ ఫ్యాక్టరీలో రియాక్టర్ పాత్రలో పేలుడు కారణంగా, ముగ్గురు కార్మికులు మరణించారు. 12 మంది గాయపడ్డారు. బాధితుల మృతదేహాలను పోస్ట్ మార్టం కోసం ప్రభుత్వ ఆసుపత్రికి తరలించామని, క్షతగాత్రులను సమీపంలోని ఆసుపత్రిలో చికిత్స అందిస్తున్నాము" అని పాల్ఘర్ పోలీసు ప్రతినిధి సచిన్ నవాద్కర్ తెలిపారు.
సమాచారం అందుకున్న బోయిసర్ పోలీస్‌స్టేషన్‌ సిబ్బంది, స్థానిక అగ్నిమాపక సిబ్బంది సంఘటనా స్థలానికి చేరుకున్నారు. పేలుడు సంభవించిన సమయంలో ఫ్యాక్టరీలో మొత్తం 18 మంది ఉద్యోగులు పనిచేస్తున్నారని బోయిసర్ పోలీస్ స్టేషన్ సీనియర్ ఇన్‌స్పెక్టర్ ప్రదీప్ కస్బే తెలిపారు. ప్రాథమిక విచారణలో, రియాక్టర్ పాత్రలో ప్రెజర్ కారణంగా పేలుడు సంభవించినట్లు ప్లాంట్ ఇన్‌చార్జి నిర్ధారించారని అధికారులు తెలిపారు."ఈ ప్లాంట్ టెక్స్‌టైల్ పరిశ్రమలో ఉపయోగించే గామా యాసిడ్‌ను తయారు చేస్తుంది. సోడియం సల్ఫేట్‌ను అమ్మోనియాతో కలపడానికి ప్రక్రియ జరుగుతున్నప్పుడు రియాక్టర్ పాత్ర పేలింది" అని అధికారులు వివరించారు. ఈ ఘటనపై దర్యాప్తు చేసేందుకు డైరెక్టరేట్ ఆఫ్ ఇండస్ట్రియల్ సేఫ్టీ అండ్ హెల్త్ అధికారుల నుంచి సాంకేతిక సహకారం తీసుకుంటామని పోలీసులు తెలిపారు.