ప్రేమే వారిపాలిట శాపం.. కాల్చి చంపేసి మొసళ్ల నదిలో..

పోలీసులు తెలిపిన వివరాల ప్రకారం.. రతన్ బసాయ్ గ్రామానికి చెందిన శివానీ తోమర్ (18), పక్కనున్న మరో ఊరికి చెందిన రాధేశ్యామ్ తోమర్ (18) కొన్నాళ్లుగా ప్రేమించుకుంటున్నారు. విషయం శివానీ ఇంట్లో తెలియడంతో కుటుంబీకులు ఇకపై అతడిని కలవొద్దని ఆమెను హెచ్చరించారు. ప్రేమించిన వ్యక్తికి దూరంగా ఉండలేకపోయింది శివానీ. పెద్దలమాట కాదని తరచూ అతడిని కలవడంతో.. శివానీ కుటుంబీకులు కోపంతో రగిలిపోయారు. పొలిమేరలో ఇద్దరినీ కాల్చి చంపారు. అంతటితో ఊరుకోకుండా మృతదేహాలకు బరువైన రాళ్లుకట్టి మొసళ్లు సంచరించే చంబల్ నదిలో పడేశారు.

కొద్దిరోజులుగా తన కొడుకుతో పాటు.. పొరుగూరికి చెందిన యువతి కూడా కనిపించడం లేదంటూ రాధేశ్యామ్ తండ్రి పోలీసులకు ఫిర్యాదు చేశాడు. వారిద్దరూ ప్రేమించుకుంటున్న సంగతి కూడా చెప్పాడు. దాంతో తొలుత ఇద్దరూ ఎక్కడికైనా పారిపోయుంటారని భావించారు పోలీసులు. కానీ అందుకు తగిన ఆధారాలేవీ దొరకలేదు. అనుమానంతో యువతి తండ్రి, కుటుంబ సభ్యులను ప్రశ్నించగా.. తామే హత్య చేసినట్లు తెలిపారు. మృతదేహాలను మొసళ్లకు మేతగా వేసినట్లు కూడా తెలిపారు. మృతదేహాల కోసం గజఈతగాళ్ల సాయం తీసుకున్నట్లు జిల్లా ఎస్పీ వివరించారు. చంబల్ నదిలో దాదాపు 2500 మొసళ్లు ఉన్నట్లు సమాచారం. పోలీసులు ఈ కేసును దర్యాప్తు చేస్తున్నారు.