Mr Telangana: ప్రాణాలు కోల్పోయిన మిస్టర్ తెలంగాణ మొహమ్మద్ సోహైల్
సిద్దిపేటకు చెందిన ప్రముఖ బాడీబిల్డర్, మిస్టర్ తెలంగాణ విజేత
సిద్దిపేటకు చెందిన ప్రముఖ బాడీబిల్డర్, మిస్టర్ తెలంగాణ విజేత మహ్మద్ సోహైల్ రోడ్డు ప్రమాదంలో మరణించాడు. అతడి వయసు 23 సంవత్సరాలే. సోహైల్, అతని స్నేహితుడు మహ్మద్ ఖదీర్ (23) జూన్ 29న ద్విచక్ర వాహనంపై సిద్దిపేట నుంచి మిరుదొడ్డి వైపు వెళ్తున్నారు. మిరుదొడ్డి సమీపంలో బైక్ నడుపుతున్న సోహైల్ అదుపు తప్పి స్క్రాప్ తో వెళ్తున్న ఆటో రిక్షాను ఢీకొట్టాడు.
ఈ ప్రమాదంలో సోహైల్, ఖదీర్‌లకు తీవ్ర గాయాలయ్యాయి. వీరిని హైదరాబాద్‌లోని ఓ ప్రైవేట్‌ ఆస్పత్రికి తరలించారు. చికిత్స పొందుతూ సోహైల్ బుధవారం మృతి చెందాడు. సోహైల్ తన కెరీర్‌లో అనేక జిల్లా-స్థాయి, రాష్ట్ర-స్థాయి, దక్షిణ భారత-స్థాయి బాడీబిల్డింగ్ ఛాంపియన్‌షిప్‌లను గెలుచుకున్నాడు. మిస్టర్ తెలంగాణ ఛాంపియన్‌షిప్‌ను కూడా గెలుచుకున్నాడు. బాడీబిల్డింగ్‌లో గొప్ప భవిష్యత్తు ఉన్న గొప్ప స్నేహితుడిని చిన్న వయసులోనే కోల్పోయామని అతని స్నేహితులు వాపోయారు. సోహైల్ కుటుంబంలో ఊహించని విషాదం నెలకొంది. కేసు నమోదు చేసుకున్న మిరుదొడ్డి పోలీసులు.. విచారణ చేయగా అతివేగమే ప్రమాదానికి కారణమని తెలిపారు.