హైదరాబాద్ లో సీరియల్ కిల్లర్ అరెస్ట్

సైబరాబాద్‌ కమిషనరేట్‌లోని మైలార్‌దేవ్‌పల్లి పోలీస్‌స్టేషన్‌లోని క్రైమ్‌వింగ్‌ పోలీసులు కరుడుగట్టిన సీరియల్‌ కిల్లర్‌ బ్యాగారి ప్రవీణ్‌ను పట్టుకున్నారు. హైదరాబాద్ జనాలను టెన్షన్ పెట్టిన సైకో కిల్లర్ ఇతడేనని చెబుతున్నారు. వారం రోజుల వ్యవధిలో మూడు హత్యలకు పాల్పడి నగరం విడిచి పారిపోయేందుకు ప్రయత్నించిన హంతకుడిని పోలీసులు అదుపులోకి తీసుకున్నారు. ఈ కేసును అత్యంత వేగంగా ఛేదించి సీరియల్‌ కిల్లర్‌ను అరెస్ట్‌ చేశారు. ఇంకా ఎవరినైనా చంపేశాడా అనే కోణంలో పోలీసులు దర్యాప్తు చేస్తున్నారు. బుధవారం రాజేంద్రనగర్‌ సర్కిల్‌ మైలార్‌ దేవుపల్లి పోలీస్‌ స్టేషన్‌ పరిధిలో మెయిన్‌ రోడ్లపై జరిగిన జంట హత్యలు కలకలం సృష్టించాయి మైలార్‌ దేవుపల్లి పోలీస్‌ స్టేషన్‌కు అతి సమీపంలో రెండు హత్యలు జరిగాయి. రోడ్డు పక్కన దుప్పట్లు అమ్ముకునే వ్యక్తిని, షాప్‌ ముందు నిద్రిస్తున్న మరో వ్యక్తిని హంతకుడు గ్రానైట్‌ రాళ్లతో కొట్టి దారుణంగా హత్య చేశాడు. ఈ హత్యలు జరిగిన 12 గంటల్లోనే హంతకుడిని పోలీసులు అదుపులోకి తీసుకున్నారు. ఈ సీరియల్‌ కిల్లర్‌ హైదరాబాద్‌లోని నేతాజీనగర్‌, దుర్గానగర్‌ చౌరస్తా, కాటేదాన్‌ ప్రాంతాల్లో తిరుగుతూ వరుస హత్యలకు పాల్పడినట్లు పోలీసులు జరిపిన విచారణలో బయట పడింది. రోడ్డు పక్కన పడుకుంటున్న వారే లక్ష్యంగా హతమారుస్తున్నట్లు గుర్తించారు.