ఐ ఫోన్ కు డబ్బుల్లేక.. డెలివరీ బాయ్ హత్య

డెలివరీ ఇచ్చేందుకు వచ్చిన ఈ-కార్ట్ బాయ్ ను చంపేశాడు. నాలుగు రోజులపాటు మృతదేహాన్ని తన ఇంట్లోనే రహస్యంగా ఉంచి.. ఆ తర్వాత రైల్వే స్టేషన్ సమీపంలోకి తీసుకెళ్లి తగలబెట్టాడు. ఈ ఘటన కర్ణాటకలోని హసన్ పట్టణంలో చోటుచేసుకుంది. అంచ్ కొప్పల్ రైల్వే స్టేషన్ సమీపంలో ఈ నెల 11న కాలిన శరీరం వెలుగు చూడడంతో దీనిపై పోలీసులు దర్యాప్తు మొదలు పెట్టారు. మృతుడు హేమంత్ నాయక్ (23)గా గుర్తించారు. అతనొక ఈ కార్ట్ ఎక్స్ ప్రెస్ ఉద్యోగి అని తెలిసింది. లక్ష్మీపుర లే అవుట్ సమీపంలో నివాసం ఉండే హేమంత్ దత్తా సెకండ్ హ్యాండ్ ఐఫోన్ ను బుక్ చేసుకోగా, దాన్ని డెలివరీ చేసేందుకు ఈ నెల 7న హేమంత్ నాయక్ వెళ్లాడు. రూ.46,000 చెల్లించాలని నాయక్ కోరగా.. దత్తా తనవద్ద డబ్బులేక హేమంత్ పై కత్తితో దాడి చేసి హతమార్చాడు. మృతదేహాన్ని ప్యాక్ చేసి బండిపై పెట్టుకుని, రైల్వే స్టేషన్ సమీపంలో దహనం చేసినట్టు పోలీసులు సీసీటీవీ ఫుటేజీల ద్వారా గుర్తించారు. నిందితుడైన దత్తాను అరెస్ట్ చేశారు.