మంత్రిన‌య్యాక చెబుతా.. టీడీపీ నేతపై వైసీపీ కీల‌క నేత వార్నింగ్ ?

ఆయ‌న మాజీ మంత్రి. కృష్ణా జిల్లాలోని కీల‌క నియోజ‌క‌వ‌ర్గం నుంచి గ‌త ఎన్నిక‌ల్లో గెలిచారు. ప్రస్తుతం మంత్రి ప‌ద‌వి కోసం ఎదురు చూస్తున్నారు. అయితే.. వ‌స్తుందా.. రాదా.. అనే సందేహాలు.. సందిగ్ధాల న‌డుమ ఆయ‌న ఊగిస‌లాడుతున్నారు. వ‌స్తే.. మంచిదే కానీ.. ఆయ‌న‌కు మంత్రి ప‌ద‌వి వ‌చ్చే అవ‌కాశం లేద‌ని.. ఆయ‌న ప్రత్యర్థులు గ‌ట్టిగా ప్రచారం చేస్తున్నారు. ముఖ్యంగా టీడీపీలో ఫైర్ బ్రాండ్ నాయ‌కుడిగా ఉన్న ఓ మాజీ ఎమ్మెల్యే.. వైసీపీ ఎమ్మెల్యేపై తీవ్రస్థాయిలో వ్యతిరేక ప్రచారం చేయిస్తున్నారు. ఆయ‌నకు మంత్రి ప‌ద‌వి రాదు .. అంటూ.. ఓ సోష‌ల్ మీడియాలో తెగ ప్రచారం చేస్తున్నారు.

చిత్రమైన రాజకీయమే…

ఈక్వేష‌న్లు.. జ‌గ‌న్ కెమిస్ట్రీ.. స‌ద‌రు వైసీపీ ఎమ్మెల్యే తీరుతెన్నుల‌ను ఉటంకిస్తూ.. నిత్యం ఆయ‌న‌పై వ్యతిరేక వార్తలు రాయిస్తున్నారట‌. దీంతో ఈ వ్యతిరేక వార్తలు.. వైసీపీలో సేమ్ సామాజిక వ‌ర్గం నాయ‌కుడు వైర‌ల్ చేయిస్తున్నారు. అంటే.. ఇక్కడో చిత్రమైన రాజ‌కీయం జ‌రుగుతోంది. త‌న‌కు ఏమాత్రం సంబంధం లేని ఓ టీడీపీ మాజీ ఎమ్మెల్యే.. త‌న సొంత పార్టీ నేత‌పై రాయిస్తున్న వ్యతిరేక వార్తల‌ను ఖండించ‌క‌పోగా.. త‌న‌కు అనుకూలంగా మార్చుకుని.. ముందు ముందు.. త‌న‌కు లాభిస్తుందేమోన‌నే ఉద్దేశంతో ఈయ‌న వాటిని ప్రచారం చేయించడం.. గ‌మ‌నార్హం. ప్రస్తుతం ఈ విష‌యంపై స‌ద‌రు సీనియ‌ర్ నాయ‌కుడు, మాజీ మంత్రి కుత‌కుత‌లాడుతున్నారు.

జగన్ దృష్టిికి తీసుకెళ్లానని….

“నేను మంత్రిని కాన‌ని వాడెవ‌డు చెప్పడానికి!“ అని టీడీపీ మాజీ ఎమ్మెల్యే అయిన‌ త‌న ప్రత్యర్థిపై స‌ద‌రు వైసీపీ నాయ‌కుడు రుస‌రుస లాడుతున్నారు. అంతేకాదు.. మంత్రిన‌య్యాక చెబుతా.. వ‌డ్డీతో స‌హా తీర్చేస్తా! అని స‌వాల్ రువ్వుతున్నారు. అంతేకాదు.. వైసీపీలో త‌న‌కు పోటీ వ‌స్తున్న నాయ‌కుడుపై కూడా తెర‌చాటున ఫైర్ అవుతున్నారు. ఈ విష‌యాన్ని అధిష్టానం దృష్టికి తీసుకువెళ్తాన‌ని.. ఇలాంటి వాటిని ప్రోత్సహించ‌వ‌చ్చా? అని నిల‌దీస్తాన‌ని కూడా ఈయ‌న అంటున్నారు. అయితే.. ఈ వార్తలు స‌హ‌జ‌మేన‌ని.. ఇలాంటి వాటిని ప‌ట్టుకుని జ‌గ‌న్ ద‌గ్గర‌కు వెళ్తే.. ఈయ‌న ప‌రువే పోతుంద‌ని.. మ‌రికొంద‌రు వ్యాఖ్యానిస్తున్నారు. మొత్తంగా చూస్తే.. ప్రస్తుతం ఈ విష‌యం హాట్ టాపిక్‌గా మారింది. మ‌రి ఎటు మ‌లుపుతిరుగుతుందో ? చూడాలి.