Hyderabad Metro : మెట్రోకు పెరిగిన రద్దీ.. ఎండల దెబ్బకు కూల్ కూల్ గా

మామూలుగానే మెట్రో రైళ్లు రద్దీ గా ఉంటాయి. వర్షాకాలం, ఎండాకాలంలో మెట్రో రద్దీ ఎక్కువగా ఉంటుంది. ద్విచక్రవాహనాల్లో విధులకు వెళితే వర్షాకాలంలో తడిసిముద్దవుతారు. అదే ఎండాకాలంలోనూ చెమటతో తడిసి ముద్దవుతున్నారు. ట్రాఫిక్ లో గంటల పాటు వాహనంపై వెయిట్ చేయాలన్నా సాధ్య పడటం లేదు. మధ్యలో ఆగే అవకాశం కూడా లేకపోవడంతో మంచినీరు తాగేందుకు కూడా అవకాశం దొరకడం లేదని వాపోతున్నారు. అందుకే మెట్రో రైళ్లకు గత కొద్ది రోజుల నుంచి గిరాకీ పెరిగిందని మెట్రో అధికారులు చెబుతున్నారు.

ఉదయం ఏడుగంటల నుంచే మెట్రో రైళ్లన్నీ ప్రయాణికులతో రద్దీగా మారుతున్నాయి. కార్లలో వెళ్లే వారు సయితం మెట్రో రైలులో ప్రయాణం సుఖంగా ఉందని భభావించి ఇటువైపు మళ్లారు. గతంలో ఎన్నడూ లేని విధంగా ఈ ఏడాది మార్చి నెలలో మెట్రో ఆదాయం పెరిగిందని లెక్కలు చెబుతున్నాయి. కిక్కిరిసి పోయి ఉండటంతో అదనపు బోగీలు కానీ, అదనపు రైళ్లను కానీ వేయాలన్న డిమాండ్ ఎక్కువగా ఉంది. అమీర్ పేట్, మాదాపూర్, రాయదుర్గం వరకూ అన్ని స్టేషన్లలో రద్దీ పెరగడంతో మెట్రో రైలు అధికారులు కొన్నిరైళ్లను పెంచాలన్న డిమాండ్ ఊపందుకుంటుంది. ఆక్యుపెన్సీ రేటు పెరగుతున్నందున రైళ్ల సంఖ్యను కూడా పెంచాలని కోరుతున్నారు.