ఎర్రగడ్డలో ట్రావెల్స్ బస్సు బీభత్సం..

బుధవారం ఉదయం 6.30 గంటల సమయంలో ధనుంజయ్ ట్రావెల్స్ కు చెందిన బస్సు ఎర్రగడ్డ నుంచి ఈఎస్ఐ వైపుకు వెళ్తోంది. ఈ క్రమంలో రైతు బజార్ సిగ్నల్ వద్ద ధనుంజయ ట్రావెల్స్ అదుపుతప్పింది. రెడ్ సిగ్నల్ పడటంతో కార్లు, మరికొన్ని ద్విచక్రవాహనాలు ఆగి ఉండగా.. వాటిమీదికి దూసుకెళ్లింది. సెయింట్ థెరిసా ఆసుపత్రి ముందున్న ట్రాఫిక్ బూత్ ను ఢీ కొట్టింది. ఈ ప్రమాదంలో రెండు కార్లు ధ్వంసమవ్వగా.. నలుగురు గాయపడ్డారు. వాహనదారుల సమాచారంతో ఘటనా ప్రాంతానికి వెళ్లిన ఎస్సార్ నగర్ పోలీసులు గాయపడిన వారిని ఆసుపత్రికి తరలించారు. ఘటనపై కేసు నమోదు చేసి దర్యాప్తు చేస్తున్నారు.