పాకిస్థాన్ కు మలేరియా భయం పట్టుకుంది. ఇటీవలి కాలంలో ఊహించని విధంగా మలేరియా కేసులు పెరుగుతూ వెళుతున్నాయి. దీంతో పెరుగుతున్న మలేరియా కేసులకు ప్రతిస్పందనగా పాక్ భారతదేశం నుండి 62 లక్షలకు పైగా దోమ తెరలను కొనుగోలు చేస్తుందని ఆ దేశ వార్తా సంస్థ జియో టీవీ నివేదిక తెలిపింది. ఊహించని విధంగా వచ్చిన వరదల కారణంగా, మలేరియా, ఇతర వెక్టర్ వ్యాధుల వ్యాప్తిని అరికట్టడానికి పాకిస్థాన్ పోరాడుతోంది. ప్రపంచ ఆరోగ్య సంస్థ (డబ్ల్యూహెచ్‌ఓ) గ్లోబల్ ఫండ్ అందించిన ఆర్థిక వనరులతో పాకిస్థాన్ ఈ దోమ తెరలను వాడుతోందని జియో టీవీ నివేదిక తెలిపింది. WHO అధికారులు వీలైనంత త్వరగా దోమతెరలను ఇవ్వాలని యోచిస్తున్నారని, వచ్చే నెలలో వాఘా మార్గం ద్వారా వీటిని పొందవచ్చని ఆశాభావం వ్యక్తం చేశారు. పాకిస్తాన్‌లోని 32 వరద ప్రభావిత జిల్లాల్లో మలేరియా వేగంగా వ్యాపిస్తోందని.. వేలాది మంది పిల్లలు దోమల వల్ల రోగాలతో బాధపడుతున్నారని జియో టీవీకి అధికారులు తెలిపారు. వరద ప్రభావిత ప్రాంతాల్లో మలేరియా ప్రధాన ప్రజారోగ్య సమస్యగా మారిందని అధికార యంత్రాంగం భావిస్తోంది.