సెంచరీ కొట్టేసిన టమాటా.. కన్నీళ్లు తెప్పిస్తున్న ఉల్లి

టమాటా లేకుండా వంటింట్లో ఏ కూర చేయడానికి వీలు లేని పరిస్థితుల్లో ధరలు ఒక్కసారిగా పెరగడంతో వినియోగదారులు ఇబ్బంది పడుతుననాు. మొన్నటి వరకూ కిలో ముప్ఫయి రూపాయలు పలికిన టమాటా ధర నేడు కిలో వంద రూపాయలకు చేరుకోవడంతో కొనుగోలు చేయడానికి కూడా జంకుతున్నారు. కూరగాయల ధరలన్నీ పెరిగిపోయాయి. సాధారణంగా ఎండా కాలంలో కూరగాయల ధరలు పెరుగుతాయి. కానీ వర్షాకాలంలోనూ కూరగాయలు ధరలు పెరగడం దిగుమతులు తగ్గడమేనని వ్యాపారులు చెబుతున్నారు. దిగుబడులు కూడా తగ్గడం కూడా ధరలు పెరగడానికి మరొక కారణంగా వ్యాపారులు చెబుతుండటం విశేషం.

ఆకుకూరలు ధరలు కూడా విపరీతంగా పెరిగిపోయాయి. నీటి ఎద్దడితో పంట చేతికి రాకపోవడంతో ఆకు కూరల ధరలు కూడా పెరిగిపోయాయి. మిర్చి కిలో ధర వందరూపాయలు దాటేసింది. అకాల వర్షాలకు చేతికొచ్చిన పంట కూడా అందకుండా పోవడంతో దిగుబడులు తగ్గిపోయాయని అంటున్నారు. ఇలా కూరగాయల ధరలతో పాటు ఉల్లి పాయల ధరల కూడా పెరిగిపోయాయి. ఉల్లిపాయల కిలో యాభై రూపాయలుకు పైగానే పలుకుతుంది. హైదరాబాద్ మార్కెట్ కు మహారాష్ట్ర నుంచి రావాల్సిన ఉల్లిపాయ దిగుమతులు తగ్గిపోయాయి. రాష్ట్రంలో ఉల్లి దిగుబడులు తగ్గడంతో ఒక్కసారిగా ధరలు పెరిగాయని వ్యాపారులు చెబుతున్నారు. మొత్తం మీద ప్రతి రోజూ వినియోగించే టమాటా, మిర్చి, ఉల్లి ధరలు విపరీతంగా పెరగడంతో వినియోగదారులు కొనుగోలు చేయలేక ఆర్థికంగా ఇబ్బందులు పడుతున్నారు.