కాల్‌ చేసి రూ.99,999 దోచుకున్నాడు.. మోసగాడి ఉచ్చులో ఎంపీ

డీఎంకే ఎంపీ దయానిధి మారన్ తనకు గుర్తు తెలియని వ్యక్తి నుండి ఫోన్ కాల్ వచ్చిందని, ఆ తర్వాత కాలర్‌తో ఎటువంటి వివరాలు పంచుకోనప్పటికీ అతని బ్యాంక్ ఖాతా నుండి సుమారు రూ.99,999 డెబిట్ అయ్యాయని పోలీసులకు ఫిర్యాదు చేశారు. కేంద్ర మాజీ మంత్రి దయానిధి మారన్ తన ఫిర్యాదులో అక్టోబర్ 8వ తేదీన తనకు తెలియని నంబర్ నుంచి ఫోన్ కాల్ వచ్చిందని తెలిపారు. కాల్ అందుకున్న తర్వాత, అతని బ్యాంక్ ఖాతా నుండి రూ. 99,999 డెబిట్ అయినట్లు పోలీసులకు ఇచ్చిన ఫిర్యాదులో తెలిపారు.

తనకు బ్యాంక్ సిబ్బంది అని చెప్పుకుంటూ, "లావాదేవీ వివరాలు" కోరిన గుర్తు తెలియని వ్యక్తి నుండి తనకు కాల్స్ వచ్చాయని ఫిర్యాదుదారు తెలిపారు. కాలర్‌తో ఎలాంటి సమాచారం పంచుకోనప్పటికీ, కొద్దిసేపటికే అనధికార లావాదేవీ జరిగినట్లు గుర్తించామని పోలీసులకు తెలిపారు. ఎంపీ ఫిర్యాదు మేరకు అక్టోబర్ 9న ఇక్కడి సైబర్ క్రైమ్ పోలీస్ స్టేషన్ (సెంట్రల్ క్రైమ్ బ్రాంచ్) కేసు నమోదు చేసింది. మోసగాళ్లను కనుగొనడం కోసం దర్యాప్తు ప్రక్రియలో వేగవంతం చేసినట్లు పోలీసులు తెలిపారు. కోల్పోయిన మొత్తాన్ని వీలైనంత త్వరగా తిరిగి పొందడానికి చెల్లింపు గేట్‌వేకి అభ్యర్థన పంపబడిందని సిటీ పోలీసులు ఒక పత్రికా ప్రకటనలో తెలిపారు.

కాల్స్ వచ్చింది ఈ నెంబర్ నుంచే..

దయానిధి మారన్ భార్యకు మరో మొబైల్ నంబర్ (+916295812314) నుంచి ఎనిమిది కాల్స్ వచ్చాయని, అప్పుడు అతనికి మొబైల్ నంబర్ +916215549621 నుంచి మరొక కాల్ వచ్చిందని తెలిపారు. ఫోన్‌ కాల్స్‌ వచ్చిన వెంటనే దయానిధి మారన్ తన సేవింగ్స్ ఖాతా నుంచి రూ.99,999 డెబిట్ అయినట్లు మెయిల్, మెసేజ్ వచ్చాయని ఎంపీ పోలీసులకు తెలిపారు. ఈ మేరకు జరిగిన మోసంపై ఆయన ట్వీట్టర్‌లో షేర్‌ చేశాడు.