తెలంగాణ రాష్ట్రంలో భజరంగ్ దళ్ ను నిషేధించేందుకు కుట్ర: బండి సంజయ్

కర్ణాటక రాష్ట్రంలో అధికారంలోకి రాగానే భజరంగ్ దళ్ ను బ్యాన్ చేస్తామని కాంగ్రెస్ పార్టీ ప్రకటించిన సంగతి తెలిసిందే..! దీనిపై దేశ వ్యాప్తంగా నిరసనలు వెల్లువెత్తాయి. ఇక తెలంగాణ రాష్ట్రంలో కూడా భజరంగ్ దళ్ ను బ్యాన్ చేయబోతున్నారని అంటున్నారు. ఈ మాట అన్నది మరెవరో కాదు తెలంగాణ బీజేపీ చీఫ్ బండి సంజయ్. రాష్ట్రంలో భజరంగ్ దళ్‌‌పై నిషేధం విధించేందుకు సీఎం కేసీఆర్ కుట్ర చేస్తున్నారని.. ఈ విషయంలో కాంగ్రెస్‌‌తో కేసీఆర్ పోటీ పడుతున్నారని అన్నారు. భారత మాతా కీ జై అంటే జైల్లో వేస్తారని, జై శ్రీరాం అంటే కేసులు పెట్టి వేధించే రోజులు రాబోతున్నాయని అన్నారు. భజరంగ్ దళ్‌‌పై నిషేధం విధించాలని ఏ ఒక్క ముస్లిం కూడా కోరుకోవడం లేదు. ఈ సంస్థ ఎక్కడా హింసను ప్రేరేపించలేదు. హిందూ ధర్మం కోసం మాత్రమే పనిచేస్తోంది. అయినా భజరంగ్ దళ్‌‌ను నిషేధించేందుకు కాంగ్రెస్, బీఆర్ఎస్ పోటీ పడుతున్నాయి అని అన్నారు